സൂപ്പര്‍ താരം അക്ഷയ് കുമാര്‍ നായകനായ ആക്ഷന്‍ ത്രില്ലര്‍ ചിത്രം ബെല്‍ബോട്ടം ഒടിടി റിലീസിന്. ഈ മാസം 16 മുതല്‍ ആമസോണ്‍ പ്രൈമിലൂടെയാവും സ്ട്രീം ചെയ്യുക.
എണ്‍പതുകള്‍ പശ്ചാത്തലത്തില്‍ ഒരുക്കിയ ബെല്‍ബോട്ടം രഞ്ജിത് എം. തിവാരിയാണ് സംവിധാനം ചെയ്തത്. കഴിഞ്ഞ മാസം 16ന് ചിത്രം തിയേറ്ററില്‍ എത്തിയെങ്കിലും സാമ്പത്തികമായി വിജയിക്കാതെ വന്നതോടെയാണ് ഒടിടി റിലീസിന് നിര്‍ബ്ബന്ധിതരായത്. കോവിഡ് രണ്ടാം തരംഗത്തിന് ശേഷം തിയേറ്ററുകള്‍ തുറന്നപ്പോള്‍ റിലീസ് ചെയ്ത ആദ്യ സൂപ്പര്‍ താര ചിത്രം കൂടിയായിരുന്നു ബെല്‍ബോട്ടം.
ആദ്യ ദിനം തിയേറ്ററില്‍നിന്ന് മൂന്ന് കോടി രൂപയില്‍ താഴെ മാത്രമാണ് കളക്ഷന്‍ നേടാനായത്. വലിയ മുതല്‍മുടക്കില്‍ വിദേശത്താണ് ഭൂരിഭാഗവും ചിത്രീകരിച്ചത്. ഹിന്ദി സിനിമകളുടെ പ്രധാന മാര്‍ക്കറ്റായ മഹാരാഷ്ട്രയില്‍ തിയേറ്ററുകള്‍ തുറന്നിട്ടില്ല. ഇതും തിരിച്ചടിക്ക് കാരണമായെന്നാണ് നിര്‍മ്മാതാക്കളുടെ വിലയിരുത്തല്‍.
തമിഴ്നാട്ടില്‍ ജയലളിതയുടെ ജീവിതം ആസ്പദമാക്കി നിര്‍മ്മിച്ച തലൈവിയും തിയേറ്ററില്‍ വലിയ ചലനം ഉണ്ടാക്കിയിട്ടില്ല.
ഇതേസമയം മാര്‍വെല്‍ സീരീസില്‍ പെട്ട ഹോളിവുഡ് ചിത്രം ഷാങ്-ചി ആന്റ് ദ ലെജന്‍ഡ് ഓഫ് ദി ടെന്‍ റിംഗ്സ്, തെലുങ്ക് ചിത്രം സീട്ടിമാര്‍ എന്നിവ ഭേദപ്പെട്ട കളക്ഷന്‍ നേടി.
രാജ്യത്താകെ ആയിരത്തില്‍ താഴെ തിയേറ്ററുകള്‍ മാത്രമാണ് തുറന്നിട്ടുള്ളത്. സ്പൈ ആക്ഷന്‍ ത്രില്ലര്‍ വിഭാഗത്തില്‍ പെട്ട ബെല്‍ബോട്ടം വലിയ പ്രേക്ഷകപ്രീതി നേടിയിരുന്നു. പക്ഷേ കോവിഡ് ഭീതിയും കൂടുതല്‍ തിയേറ്ററുകള്‍ തുറക്കാത്തതും പ്രതിസന്ധിയുണ്ടാക്കി. ഈ സാഹചര്യത്തില്‍ കൂടുതല്‍ തിയേറ്റര്‍ റിലീസിന് നിര്‍മ്മാതാക്കള്‍ മടിക്കുകയാണ്.
Recent Comments