ലിസ്റ്റിന്‍ സ്റ്റീഫനും പൃഥ്വിരാജുമായി പിണക്കത്തിലാണ്, ഇരുവരും അടിച്ചുപിരിഞ്ഞു എന്നൊക്കെയുള്ള പ്രചരണങ്ങള്‍ ശക്തി പ്രാപിക്കുന്നതിനിടെയാണ് ഇന്ന്, പൃഥ്വിരാജിന്റെ പിറന്നാള്‍ ദിനത്തില്‍ പുതിയ ചിത്രത്തിന്റെ ടൈറ്റില്‍ അനൗണ്‍സ് ചെയ്യപ്പെട്ടത്. സന്തോഷ് ട്രോഫി എന്നാണ് ചിത്രത്തിന്റെ പേര്. സാക്ഷാല്‍ ലിസ്റ്റിന്‍ സ്റ്റീഫന്‍ തന്നെയാണ് ചിത്രം നിര്‍മ്മിക്കുന്നത്. സുപ്രിയാമേനോന്‍ നിര്‍മ്മാണ പങ്കാളിയാണ്. അതായത് ലിസ്റ്റിന്‍ സ്റ്റീഫന്റെ മാജിക് ഫ്രെയിംസും പൃഥ്വിരാജ് പ്രൊഡക്ഷനും വീണ്ടും ഒരുമിക്കുന്നുവെന്ന് ചുരുക്കം. ഇരുവരും അടിച്ചുപിരിഞ്ഞു എന്ന വാര്‍ത്ത പ്രചരിപ്പിച്ചവര്‍ക്കും അത് കേള്‍ക്കാനിരുന്നവര്‍ക്കും മുഖത്തടിച്ചതുപോലെയായി സന്തോഷ് ട്രോഫിയുടെ ടൈറ്റില്‍ അനൗണ്‍സ്‌മെന്റ്.
വിപിന്‍ദാസാണ് ചിത്രം തിരക്കഥ എഴുതി സംവിധാനം ചെയ്യുന്നത്. ഗുരുവായൂര്‍ അമ്പലനടയില്‍ എന്ന ചിത്രത്തിനുശേഷം പൃഥ്വിരാജുമായി വിപിന്‍ദാസ് ഒന്നിക്കുന്ന സിനിമ കൂടിയാണിത്. ചിത്രത്തിന്റെ മറ്റ് അണിയറപ്രവര്‍ത്തകരുടെ വിവരങ്ങളൊന്നും പുറത്ത് വിട്ടിട്ടില്ല. പക്ഷേ ചിത്രം 2025 ല്‍ റിലീസ് ചെയ്യുമെന്ന് ഇവര്‍ പറയുന്നുണ്ട്. പക്ഷേ ഷൂട്ടിംഗ് ഈ വര്‍ഷം ഉണ്ടാവാനിടയില്ല. നിലവില്‍ പൃഥ്വിരാജ് സംവിധാനം ചെയ്യുന്ന എമ്പുരാന്റെ ഷൂട്ടിംഗ് പൂര്‍ത്തിയാക്കാനുണ്ട്. വിലായത്ത് ബുദ്ധയുടെ അവശേഷിക്കുന്ന ഷെഡ്യൂളും പൃഥ്വിയുടെ ഈ വര്‍ഷത്തെ കമ്മിറ്റ്‌മെന്റ്‌സില്‍ പെടുന്നതാണ്.
Recent Comments