മലയാളി സിനിമാപ്രേമികള്‍ ആകാക്ഷയോടെ കാത്തിരിക്കുന്ന ചിത്രങ്ങളില്‍ ഒന്നാണ് എമ്പുരാന്‍. പൃഥ്വിരാജിന്റെ സംവിധാന അരങ്ങേറ്റ ചിത്രമായ, വന്‍ വിജയം നേടിയ ലൂസിഫറിന്റെ രണ്ടാം ഭാഗം എന്ന നിലയിലാണ് എമ്പുരാനെ കാണുന്നത്. കഴിഞ്ഞ ഏതാനും ദിവസങ്ങളായി ചിത്രത്തിലെ കഥാപാത്രങ്ങളെ ഓരോരുത്തരെയായി അവതരിപ്പിക്കുകയാണ് അണിയറക്കാര്‍. ഇപ്പോഴിതാ ഒരു കഥാപാത്രത്തെക്കൂടി പ്രേക്ഷകര്‍ക്ക് മുന്നില്‍ അവതരിപ്പിച്ചിരിക്കുകയാണ്. മലയാളികള്‍ക്ക് സുപരിചിതനായ കന്നഡ താരം കിഷോര്‍ ആണ് അത്. മലയാളിയായ ഐബി ഓഫീസര്‍ കാര്‍ത്തിക് എന്ന കഥാപാത്രത്തെയാണ് കിഷോര്‍ എമ്പുരാനില്‍ അവതരിപ്പിച്ചിരിക്കുന്നത്.
വന്‍ വിജയം നേടിയ ലൂസിഫറിന്റെ സീക്വല്‍ എന്ന നിലയില്‍ എമ്പുരാന്റെ അവസരം വന്നപ്പോഴേ താന്‍ മറ്റൊന്നും ആലോചിക്കാതെ അത് സ്വീകരിച്ചെന്ന് കിഷോര്‍ പറയുന്നു. മലയാളവും ഇംഗ്ലീഷും സംസാരിക്കേണ്ട കഥാപാത്രമാണ് ഇത്. മലയാളം ഒരു മലയാളിയെപ്പോലെ സംസാരിക്കേണ്ടതുണ്ടായിരുന്നു, അതും വേഗത്തില്‍. ചിത്രീകരണത്തിനിടെ പൃഥ്വിരാജ് തന്നോട് ഏറ്റവുമധികം ആവശ്യപ്പെട്ടത് മലയാളം കുറച്ചുകൂടി വേഗത്തില്‍ സംസാരിക്കാന്‍ ആയിരുന്നുവെന്നും കിഷോര്‍ പറയുന്നു.
പുലിമുരുകന് ശേഷം കിഷോര്‍ അഭിനയിക്കുന്ന മോഹന്‍ലാല്‍ ചിത്രം കൂടിയാണ് എമ്പുരാന്‍. പുലിമുരുകനില്‍ ആര്‍കെ എന്ന ഫോറസ്റ്റ് ഓഫീസറെയാണ് കിഷോര്‍ അവതരിപ്പിച്ചത്. മോഹന്‍ലാലുമായി ഏറെ കോമ്പിനേഷന്‍ സീനുകള്‍ ഉണ്ടായിരുന്ന, ശ്രദ്ധേയ കഥാപാത്രങ്ങളില്‍ ഒന്നുമായിരുന്നു അത്. മാര്‍ച്ച് 27 നാണ് എമ്പുരാന്റെ റിലീസ്. ആശിര്‍വാദ് സിനിമാസിനൊപ്പം തമിഴിലെ പ്രമുഖ ബാനറായ ലൈക്ക പ്രൊഡക്ഷന്‍സും ചേര്‍ന്നാണ് ചിത്രം നിര്‍മ്മിക്കുന്നത്.
Recent Comments