ഏറെ പ്രതീക്ഷയോടെ പ്രേക്ഷകര്‍ കാത്തിരിക്കുന്ന ചിത്രമാണ് വിനീത് ശ്രീനിവാസന്റെ വര്‍ഷങ്ങള്‍ക്ക് ശേഷം. ചിത്രത്തിന്റെ ഷൂട്ടിങ്ങ് പുരോഗമിക്കുന്നതിനിടെ സംവിധായകന്‍ പ്രിയദര്‍ശന്‍ ലൊക്കേഷന്‍ സന്ദര്‍ശിച്ചു. പ്രിയന്‍ വിനീതിന്റെ തോളത്ത് കൈ പിടിച്ച് നില്‍ക്കുന്ന ഫോട്ടോയും പുറത്ത് വന്നിട്ടുണ്ട്.
പ്രണവ് മോഹന്‍ലാലിനൊപ്പം പ്രിയദര്‍ശന്റെ മകളായ കല്യാണി പ്രിയദര്‍ശനും ഹൃദയത്തിന് ശേഷം ഒന്നിക്കുന്നു എന്ന പ്രത്യേകത കൂടി ചിത്രത്തിനുണ്ട്. റിലീസായ സമയത്ത് ഹൃദയം കാണാന്‍ പ്രിയദര്‍ശന്‍ വന്നപ്പോള്‍ എടുത്ത ഫോട്ടോ വിനീത് അന്ന് പങ്കുവെച്ചിരുന്നു. മില്യണ്‍ ഡോളര്‍ ചിത്രം എന്നായിരുന്നു ഫോട്ടോയിക്ക് വിനീത് അടിക്കുറുപ്പ് നല്‍കിയത്. ഹൃദയത്തിന്റെ സമയത്ത് മോഹന്‍ലാലിന്റെ ലൊക്കേഷന്‍ സന്ദര്‍ശനവും ചര്‍ച്ചയായിരുന്നു.
ജൂലൈയില്‍ ആണ് വര്‍ഷങ്ങള്‍ക്ക് ശേഷം സിനിമ ഔദ്യോഗികമായി പ്രഖ്യാപിച്ചത്. പ്രണവിനും കല്യാണിക്കുമൊപ്പം ധ്യാന്‍ ശ്രീനിവാസന്‍, അജു വര്‍ഗീസ്, ബേസില്‍ ജോസഫ്, നീരജ് മാധവ്, നിത പിള്ള, അര്‍ജുന്‍ ലാല്‍, നിഖില്‍ നായര്‍, നിവിന്‍ പോളി എന്നിവരാണ് ചിത്രത്തില്‍ പ്രധാന വേഷത്തില്‍ എത്തുന്ന താരങ്ങള്‍. വിനീത് ശ്രീനിവാസനും ചിത്രത്തില്‍ അഭിനയിക്കുന്നുണ്ട്. മേരിലാന്റ് സിനിമാസിന്റെ ബാനറില്‍ വൈശാഖ് സുബ്രഹ്‌മണ്യം ആണ് ചിത്രം നിര്‍മിക്കുന്നത്.
Recent Comments