തെന്നിന്ത്യന്‍ താരം പ്രഭാസിന്റെ ജന്മദിനത്തോടനുബന്ധിച്ച് രാധേശ്യാമിന്റെ പുതിയ ടീസര്‍ പുറത്തിറക്കി അണിയറപ്രവര്‍ത്തകര്‍. രാധേശ്യാമിലെ പ്രഭാസിന്റെ നായകകഥാപാത്രമായ വിക്രമാദിത്യയെ പരിചയപ്പെടുത്തുകയാണ് ഈ ടീസറിലൂടെ. ഇതിന് മുന്നോടിയായി ആരാണ് വിക്രമാദിത്യ എന്ന ക്യാപ്ഷനോടെ രാധേശ്യാമിന്റെ പുതിയ പോസ്റ്റര്‍ കഴിഞ്ഞ ദിവസങ്ങളില്‍ പ്രകാശം ചെയ്തിരുന്നു. അതിന് ഉത്തരം പറയുകയാണ് ഇപ്പോള്‍ പുറത്തിറങ്ങിയ ടീസര്‍.
ഒരു പതിറ്റാണ്ടിന് ശേഷം പ്രഭാസ് റൊമാന്റിക് വേഷം കൈകാര്യം ചെയ്യുന്ന ചിത്രമെന്ന ഖ്യാതിയോടെയാണ് രാധേശ്യാം ഒരുങ്ങുന്നത്. ഇതിനോടകം തന്നെ പുറത്തുവന്ന പോസ്റ്ററുകള്‍ എല്ലാം സിനിമാപ്രേമികള്‍ ഇരുകൈയും നീട്ടി സ്വീകരിച്ചിരുന്നു.
പൂജാ ഹെഗ്ഡെയും പ്രഭാസും താരജോഡികളായി ഒന്നിച്ചഭിനയിക്കുന്ന ആദ്യ ചിത്രം കൂടിയാണ് രാധേശ്യാം. പ്രമുഖ സംവിധായകന്‍ രാധാകൃഷ്ണകുമാര്‍ സംവിധാനം ചെയ്യുന്ന ചിത്രം യുവി ക്രിയേഷന്റെ ബാനറില്‍ വംസി, പ്രമോദ് എന്നിവരാണ് നിര്‍മ്മിക്കുന്നത്. ചിത്രം പൊങ്കല്‍ ദിവസമായ ജനുവരി 14 ന് പ്രദര്‍ശനത്തിന് എത്തും.
Recent Comments