തെന്നിന്ത്യന്‍ സിനിമയിലെ നിത്യഹരിത നായകന്‍ റഹ്മാന് ഇത് തിരക്കിന്റെ കാലം. പുതു വര്‍ഷവും തുടര്‍ന്നുള്ള കാലവും റഹ്മാനെ സംബന്ധിച്ചിടത്തോളം ശുഭോദര്‍ക്കം.
രണ്ടു ഭാഗങ്ങളുള്ള മണിരത്‌നത്തിന്റെ ഡ്രീം പ്രോജാക്റ്റ് പൊന്നിയിന്‍ സെല്‍വന്‍ പൂര്‍ത്തിയാക്കിയ റഹ്മാന് ഒരു ബ്രഹ്മാണ്ഡ ഹിന്ദി സിനിമയിലൂടെ ബോളിവുഡിലും ചുവടുറപ്പിക്കുകയാണ്. മൂന്ന് ദേശീയ അവാര്‍ഡുകളും മറ്റ് ഒട്ടനവധി അവാര്‍ഡുകളും നേടിയിട്ടുള്ള ബോളിവുഡിലെ പ്രശസ്ത എഴുത്തുകാരനും സംവിധായകനുമായ വികാസ് ബാലിന്റെ രണ്ടു ഭാഗങ്ങളുള്ള ‘ഗണപത്’ എന്ന ബ്രഹ്മാാണ്ഡ സിനിമയിലൂടെയാണ് ഹിന്ദിയിലേക്കുള്ള റഹ്മാന്റെ ചുവടുവെയ്പ്പ്.
ക്യൂന്‍, സൂപ്പര്‍ 30, ചില്ലാര്‍ പാര്‍ട്ടി തുടങ്ങി ഒട്ടേറേ സിനിമകള്‍ സംവിധാനം ചെയ്ത സംവിധായകനാണ് വികാസ്. ടൈഗര്‍ ഷറഫ്, റഹ്മാന്, കൃതി സനോണ്‍ എന്നിവര്‍ കേന്ദ്ര കഥാപാത്രങ്ങളാകുന്ന ഗണപത് ഏറെ വ്യത്യസ്തതയാര്‍ന്ന ഫ്യൂച്ചറിസ്റ്റിക് സിനിമയാണ്. കഴിഞ്ഞ രണ്ടു മാസത്തിലേറെയായി ലണ്ടനില്‍ ഈ ചിത്രത്തിന്റെ ഷൂട്ടിങ്ങിലാണ് റഹ്മാന്. ഹിന്ദി സിനിമയിലെ ചുവടു വെയ്പ്പിനെ കുറിച്ചും ആദ്യാനുഭവങ്ങളെ കുറിച്ചും ആരായവെ റഹ്മാന് വാചാലനായി.
‘മൂന്ന് മാസത്തോളം ഹിന്ദി പഠനം, സ്‌ക്രിപ്റ്റ് റീഡിംഗ്, മേക്കപ്പ് ടെസ്റ്റ് എന്നിങ്ങനെയുള്ള തയ്യാറെടുപ്പുകള്‍ക്ക് ശേഷമാണ് ഷൂട്ടിങ്ങിനായി ലണ്ടനില്‍ എത്തിയത്. അതുപോലെ ഷൂട്ടിംഗ് തുടങ്ങുന്നതിന് മൂന്നു മാസം മുന്‍പ് തന്നെ ഡയറക്ടറും സംഘവും ചാര്‍ട്ടിങ്ങും പൂര്‍ത്തിയാക്കിയിരുന്നു. പൊതുവെ തെന്നിന്ത്യന്‍ ആര്‍ട്ടിസ്റ്റുകളോടും മറ്റും ബോളിവുഡുകാര്‍ക്ക് അവഗണനയാണെന്നായിരുന്നു കേട്ടറിവ്. എന്നാല്‍ ആ കേട്ടറിവുകള്‍ക്ക് വിരുദ്ധമായിരുന്നു എന്റെ അനുഭവം. സെറ്റിലെ പ്ലാനിംഗ്, ചിട്ട, കൃത്യനിഷ്ഠ, ഡിസിപ്ലിന്‍, എത്ര വലിയ ആര്‍ട്ടിസ്റ്റുകളാണെങ്കിലും വലുപ്പചെറുപ്പമില്ലാതെ, തൊഴിലാളി – ആര്‍ട്ടിസ്റ്റ് ഭേദമന്യേ ഫ്രണ്ട്ലിയായ അവിടുത്തെ പെരുമാറ്റം ഇതൊക്കെ എന്നെ ആകര്‍ഷിക്കുകയും അത്ഭുതപ്പെടുത്തുകയും ചെയ്തു. ആര്‍ട്ടിസ്റ്റുകളും പ്രൊഡക്ഷന്‍ ബോയിയും ലൈറ്റ്മാന്‍മാരും സൗഹൃദത്തോടെ പെരുമാറുന്ന ആ കാഴ്ച എനിക്ക് ആദ്യാനുഭവമായിരുന്നു.
ടൈഗര്‍ ഷറഫിന്റെ എളിമയും സ്‌നേഹവും എത്ര പറഞ്ഞാലും മതി വരില്ല. ടൈഗറുമായി രണ്ടു ദിവസം ഇടപഴകിയാല്‍ തന്നെ നമുക്കും ഇതു പോലെ ഒരു മകന്‍ ഉണ്ടായിരുന്നെങ്കില്‍ എന്ന് ആശിച്ചുപോകും. അത്രയും നല്ല സ്‌നേഹത്തിന്റെയും പെരുമാറ്റത്തിന്റെയും ഉടമയാണ് അദ്ദേഹം. അതുപോലെ കൃത്യനിഷ്ഠ പാലിക്കുന്നതിലും മുമ്പനാണ്. കൃതിയുടെ കാര്യവും മറിച്ചല്ല. ആദ്യദിവസം തന്നെ ദീര്‍ഘകാല പരിചയക്കാരെ പോലെയുള്ള പെരുമാറ്റവും സ്‌നേഹവുമായിരുന്നു അവരുടെതും. അവര്‍ ഓരോ സീനും ചെയ്യുന്നതിനും മുമ്പായി ‘നമുക്ക് അങ്ങനെ ചെയ്യാമോ ഇങ്ങനെ ചെയ്യാമോ’ എന്ന് അഭിപ്രായം ആരായും. അത്രയും ഡെടിക്കേറ്റഡാണ് കൃതി. തങ്ങളുടെ പ്രശസ്തിയുടെ ജാടയൊന്നും ആര്‍ക്കുമില്ല.
നിര്‍മ്മാതാവും രചയിതാവും സംവിധായകനും ബോളിവുഡ് സിനിമയിലെ പ്രശസ്തനുമാണെങ്കിലും സ്‌നേഹത്തോടെ പെരുമാറുന്ന ജാടയില്ലാത്ത ആളാണ് വികാസ് ബാല്‍. ആരെയും നോവിപ്പിക്കാത്ത നമ്മളില്‍ ഒരാള്‍ എന്ന പോലെയാണ് അദ്ദേഹത്തിന്റെ പെരുമാറ്റവും സമീപനവും. ഒരിക്കല്‍ വികാസുമായി ഇടപഴകിയാല്‍ ആര്‍ക്കും അദ്ദേഹത്തെ പിരിയാന്‍ മനസ്സു വരില്ല. അതുപോലെ ബോളിവുഡില്‍ തുടക്കക്കാരനായ എന്നോടുള്ള പ്രൊഡ്യൂസര്‍മാരുടെ സഹകരണവും ട്രീറ്റ്‌മെന്റും എക്‌സലസെലന്റ്…. ഇങ്ങനെ ഒരുപാട് മധുരതരമായ അനുഭവങ്ങളാണ് ഗണപതിന്റെ സെറ്റില്‍നിന്നും എനിക്ക് ലഭിച്ചു കൊണ്ടിരിക്കുന്നത്.’ റഹ്മാന് തന്റെ ബോളിവുഡ് അനുഭവങ്ങള്‍ പങ്കു വെച്ചു കൊണ്ട് പറഞ്ഞു.
പൂജാ എന്റര്‍ടൈന്‍മെന്റ്‌സാണ് ചിത്രത്തിന്റെ നിര്‍മ്മാതാക്കള്‍. ചിത്രത്തെകുറിച്ച് കൂടുതല്‍ വിശദാംശങ്ങളൊന്നും അണിയറക്കാര്‍ പുറത്തു വിട്ടിട്ടില്ല. ലണ്ടനിലും ഇന്ത്യയിലുമായി അടുത്ത വര്‍ഷം മാര്‍ച്ച് മാസത്തോടു കൂടി ഈ ബിഗ് ബജറ്റ് ബ്രഹ്മാണ്ഡ ചിത്രത്തിന്റെ ഷൂട്ടിംഗ് പൂര്‍ത്തിയാവും.
മകളുടെ വിവാഹം പ്രമാണിച്ച് ഒരാഴ്ചത്തെ ഇടവേളയില്‍ ലണ്ടനില്‍ നിന്നും ചെന്നൈയില്‍ എത്തിയതായിരുന്നു താരം. നവാഗത സംവിധായകന്‍ ചാള്‍സ് ജോസഫിന്റെ ‘സമാറ’യാണ് പുതു വര്‍ഷത്തില്‍ ആദ്യം റിലീസിനൊരുങ്ങുന്ന റഹ്മാന്റെ മലയാള ചിത്രം. റഹ്മാന് നായകനാവുന്ന ‘അഞ്ചാമൈ’, റഹ്മാന്, ജയം രവി, അര്‍ജുന്‍ എന്നിവര്‍ ഒന്നിക്കുന്ന മള്‍ടി സ്റ്റാര്‍ ചിത്രമായ ‘ജനഗണമന’, നടന്‍ വിശാലിന്റെ ആദ്യ സംവിധാനസംരംഭമായ ‘തുപ്പറിവാളന്‍ 2’, കാര്‍ത്തിക് നരേന്‍ സംവിധാനം ചെയ്യുന്ന പുതിയ ചിത്രം എന്നിവയാണ് റഹ്മാന്റെ മറ്റു തമിഴ് പ്രോജക്ടുകള്‍. വാര്‍ത്താപ്രചരണം സി.കെ. അജയ് കുമാര്‍.
Recent Comments