ചെസ്സ്, കളര്‍, കംഗാരു, ഉലകംചുറ്റും വാലിബന്‍, ചീഫ് മിനിസ്റ്റര്‍ ഗൗതമി എന്നീ ചിത്രങ്ങള്‍ മലയാളത്തിന് സമ്മാനിച്ച രാജ് ബാബു സംവിധാനം ചെയ്യുന്ന പുതിയ സിനിമയാണ് ചാട്ടുളി. ചിത്രത്തിന്റെ ടൈറ്റില്‍ പോസ്റ്റര്‍ ഇന്ന് റിലീസായി. ഷൈന്‍ ടോം ചാക്കോ, കലാഭവന്‍ ഷാജോണ്‍, ജാഫര്‍ ഇടുക്കി എന്നിവരാണ് ചിത്രത്തിലെ കേന്ദ്രകഥാപാത്രങ്ങളെ അവതരിപ്പിക്കുന്നത്. കാര്‍ത്തിക് വിഷ്ണുവും (ഗപ്പി ഫെയിം) ഒരു പ്രധാന വേഷം ചെയ്യുന്നു. മാര്‍ച്ച് 15 ന് അട്ടപ്പാടിയില്‍ ഷൂട്ടിംഗ് തുടങ്ങും.
‘ആദിവാസി സമൂഹവുമായി ബന്ധപ്പെട്ട് നടക്കുന്ന സംഭവമാണ് ചിത്രം പറയുന്നത്. അട്ടപ്പാടിയാണ് ചിത്രത്തിന്റെ പ്രധാന ലൊക്കേഷന്‍. ത്രില്ലറാണ് ചിത്രം. ജയേഷ് മൈനാഗപ്പള്ളിയാണ് കഥയും തിരക്കഥയും സംഭാഷണവും എഴുതുന്നത്. സംവിധായകന്‍ ഹരികുമാറിന്റെ കീഴില്‍ അസോസിയേറ്റായി പ്രവര്‍ത്തിച്ചിട്ടുള്ള ആളാണ് ജയേഷ്. ജയേഷിനെ എനിക്ക് നേരത്തേ പരിചയമുണ്ട്. ഷാജി പട്ടിക്കര വഴിയാണ് ഈ കഥയുമായി ജയേഷ് എന്റെ അടുക്കല്‍ എത്തുന്നത്. ഒ.ടി.ടിക്കുവേണ്ടി ഒരു ചെറിയ ചിത്രമെന്ന നിലയില്‍ തുടങ്ങിയതായിരുന്നു. തിരക്കഥ പൂര്‍ത്തിയായപ്പോള്‍ അതൊരു തീയേറ്റര്‍ ചലച്ചിത്രമായി മാറി. ഈ കഥയുമായി ആദ്യം പോയതും ഷൈന്‍ ടോമിന്റെ അടുക്കലാണ്. കേട്ടപ്പോള്‍തന്നെ അദ്ദേഹം ചെയ്യാമെന്ന് സമ്മതിക്കയായിരുന്നു. ഒറ്റ ഷെഡ്യൂളില്‍ ചിത്രീകരണം പൂര്‍ത്തിയാകും. മെയില്‍ റിലീസ് ചെയ്യാനാണ് ഉദ്ദേശിക്കുന്നത്.’ രാജ് ബാബു കാന്‍ ചാനലിനോട് പറഞ്ഞു.
ഷാ ഫൈസി, നെല്‍സണ്‍ ഐപ്പ്, സുജന്‍ കുമാര്‍ എന്നിവര്‍ ചേര്‍ന്നാണ് ചിത്രം നിര്‍മ്മിക്കുന്നത്. പ്രമോദ് കെ. പിള്ള ഛായാഗ്രഹണം നിര്‍വ്വഹിക്കുന്ന ചിത്രത്തിന്റെ എഡിറ്റര്‍ അയൂബ് ഖാനാണ്. ഷാജി പട്ടിക്കരയാണ് പ്രൊഡക്ഷന്‍ കണ്‍ട്രോളര്‍. അപ്പുണ്ണി സാജന്‍ പ്രൊഡക്ഷന്‍ ഡിസൈനറും റഹീം കൊടുങ്ങല്ലൂര്‍ മേക്കപ്പും രാധാകൃഷ്ണന്‍ മങ്ങാട് വസ്ത്രാലങ്കാരവും നിര്‍വ്വഹിക്കുന്നു. ഏങ്ങണ്ടിയൂര്‍ ചന്ദ്രശേഖരന്‍, ആന്റണി പോള്‍ എന്നിവരുടെ വരികള്‍ക്ക് ബിജിബാല്‍, ജസ്റ്റിന്‍ ഫിലിപ്പോസ് എന്നിവര്‍ സംഗീതം പകരുന്നു.
Recent Comments