മണിരത്‌നത്തിന്റെ പൊന്നിയിന്‍ സെല്വന് വേണ്ടി റഫീക് അഹമ്മദ് രചിച്ച് ഏ.ആര്‍. റഹ്‌മാന്‍ സംഗീതം പകര്‍ന്ന ‘രാക്ഷസ മാമനെ, രാവിന്റെ സൂര്യനെ’ എന്ന ലിറിക് വീഡിയോ ഗാനം അണിയറക്കാര്‍ പുറത്തു വിട്ടു. ശ്രേയാ ഘോഷാലാണ് ഈ ഗാനം ആലപിച്ചിരിക്കുന്നത്. പാലക്കാട് ശ്രീറാം, മഹേഷ് വിനായക് റാം എന്നിവരാണ് മറ്റ് ഗായകര്‍.
വന്തിയ തേവനായി എത്തുന്ന കാര്‍ത്തിയുടെ കഥാപാത്രത്തെ വര്‍ണ്ണിക്കുന്നതാണ് ഗാനം. വിഡിയോ പുറത്തിറങ്ങി നിമിഷങ്ങള്‍ക്കകം സമൂഹ മാധ്യമങ്ങളില്‍ വൈറലായി.
മണിരത്‌നം അണിയിച്ചൊരുക്കിയ മള്‍ട്ടി സ്റ്റാര്‍ ബ്രന്മാണ്ട ചിത്രമാണ് ‘പൊന്നിയിന്‍ സെല്വന്’. അമ്പതുകളില്‍ തമിഴ് ഇതിഹാസ സാഹിത്യകാരന്‍ ‘കല്‍ക്കി’ കൃഷ്ണ മൂര്‍ത്തി രചിച്ച , ഭാഷയ്ക്കതീതമായി വായനക്കാരെ ആകര്‍ഷിച്ച് വിശ്വ പ്രസിദ്ധിയാര്‍ജ്ജിച്ച 2400 പേജുകളുള്ള ചരിത്ര നോവലാണ് പൊന്നിയിന്‍ സെല്വന്. അതു കൊണ്ട് തന്നെ നോവല്‍ ചലച്ചിത്രമാവുമ്പോള്‍ ഇന്ത്യന്‍ സിനിമയിലെ എറ്റവും വലിയ ചലച്ചിത്രമാവുമെന്നുള്ളത് ഉറപ്പാണ്.
വിക്രം, കാര്‍ത്തി, ജയം രവി, ജയറാം, റഹ്‌മാന്‍, പ്രഭു, ശരത് കുമാര്‍, ബാബു ആന്റണി, പ്രകാശ് രാജ്, ലാല്‍, വിക്രം പ്രഭു, പാര്‍ത്ഥിപന്‍, അശ്വിന്‍ കാകുമാനു, റിയാസ് ഖാന്‍, ഐശ്വര്യാ റായ് ബച്ചന്‍, ഐശ്വര്യ ലക്ഷ്മി, തൃഷ, ശോഭിതാ ദുലിപാല, ജയചിത്ര തുടങ്ങി ഒട്ടേറേ അഭിനേതാക്കള്‍ ചിത്രത്തില്‍ അണിനിരക്കുന്നു.
ചിത്രത്തിന്റെ കേരളത്തിലെ വിതരണവകാശം ഗോകുലം മൂവീസിനാണ്. മണിരത്‌നത്തിന്റെ മദ്രാസ് ടാക്കീസും, സുഭാസ്‌ക്കരന്റെ ലൈക്കാ പ്രൊഡക്ഷന്‍സും സംയുക്തമായി നിര്‍മ്മിച്ച രണ്ടു ഭാഗങ്ങളുള്ള പൊന്നിയിന്‍ സെല്‍വന്റെ ഒന്നാം ഭാഗം (പി എസ് 1 ) സെപ്റ്റംബര്‍ 30 ന് ലോകമെമ്പാടും റിലീസ് ചെയ്യും. വാര്‍ത്താപ്രചരണം സി.കെ. അജയ് കുമാര്‍.
Recent Comments