കോവിഡ് വ്യാപനം മൂലം പല സിനിമകളുടെയും റിലീസ് മാറ്റിവെയ്ക്കുന്ന സാഹചര്യമാണിപ്പോള്‍. റിലീസ് തീയതി പ്രഖ്യാപിക്കുകയും തുടര്‍ന്ന് ദിവസങ്ങള്‍ക്കകം അതിന്റെ പ്രദര്‍ശനം പിന്‍വലിക്കുകയും ചെയ്യുന്നതു മൂലം തീയേറ്റര്‍ മേഖലയാകെ പ്രതിസന്ധിയിലാണ്. എങ്കിലും പട സിനിമയുടെ അണിയറക്കാര്‍ ഈ പ്രതികൂല കാലഘട്ടത്തില്‍ പോലും ചിത്രം ഫെബ്രുവരി 11 ന് റിലീസ് പ്രഖ്യാപിച്ചിരിക്കുകയാണ്.
View this post on Instagram
കുഞ്ചാക്കോ ബോബന്‍, ജോജു ജോര്‍ജ്, ദിലീഷ് പോത്തന്‍, വിനായകന്‍ എന്നിവരാണ് ചിത്രത്തിലെ പ്രധാന കഥാപാത്രങ്ങളെ കൈകാര്യം ചെയ്യുന്നത്. ചിത്രം ഫെബ്രുവരിയില്‍ പ്രേക്ഷകരിലേക്ക് എത്തുമെന്നാണ് സൂചന. കമല്‍ കെ.എം ആദ്യമായി സംവിധാനം ചെയ്യുന്ന മലയാള ചിത്രമാണ് ‘പട’. ഇ4 ഫോര്‍ എന്റര്‍ടെയ്ന്‍മെന്റ്, എ.വി.എ പ്രൊഡക്ഷന്‍സ് എന്നിവയുടെ ബാനറില്‍ മുകേഷ് ആര്‍. മെഹ്ത, എ.വി. അനൂപ്, സി.വി. സാരഥി എന്നിവര്‍ ചേര്‍ന്നാണ് ചിത്രം നിര്‍മിക്കുന്നത്.
പ്രകാശ് രാജ്, സലിം കുമാര്‍, ജഗദീഷ്, ഇന്ദ്രന്‍സ്, ടി.ജി.രവി, അര്‍ജുന്‍ രാധാകൃഷ്ണന്‍, ഉണ്ണിമായ പ്രസാദ്, സാവിത്രി ശ്രീധരന്‍, കനി കുസൃതി തുടങ്ങിയവര്‍ മറ്റ് പ്രധാന കഥാപാത്രങ്ങളെ അവതരിപ്പിക്കുന്നു. സമീര്‍ താഹിറാണ് ക്യാമറ ചലിപ്പിക്കുന്നത്. വിഷ്ണു വിജയ് സംഗീതം കൈകാര്യം ചെയ്യുന്നു. എഡിറ്റിങ് ഷാന്‍ മുഹമ്മദ്.
കോവിഡ് പ്രതികൂല സാഹചര്യത്തിനിടെ രണ്ട് വര്‍ഷം കൊണ്ടാണ് പടയുടെ ചിത്രീകരണം പൂര്‍ത്തിയാക്കിയത്. 1980കളുടെ പശ്ചാത്തലത്തിലാണ് ചിത്രത്തിന്റെ കഥ മുന്‍പോട്ട് പോകുന്നത്.
2012 പുറത്തിറങ്ങിയ ഹിന്ദി ചിത്രം ഐ.ഡി ആയിരുന്നു കമല്‍ കെ.എം സംവിധാനം ചെയ്ത ആദ്യ ചിത്രം. വിവിധ ഫിലിം ഫെസ്റ്റിവലുകളില്‍ പ്രദര്‍ശിപ്പിച്ച ചിത്രം വലിയ നിരൂപകപ്രശംസ നേടിയെടുത്തിരുന്നു.
Recent Comments