സഞ്ജയ് ലീലാ ബന്‍സാലി – ആലിയാ ഭട്ട് കൂട്ടുകെട്ടിന്റെ ഗംഗുഭായ് കത്തിയവാഡി ഫെബ്രുവരി 18 ന്

സിനിമാ പ്രേമികള്‍ ഏറെ ആകാഷയോടെ കാത്തിരിക്കുന്ന ചിത്രമാണ് ആലിയാഭട്ട് കേന്ദ്ര കഥാപാത്രമാവുന്ന ‘ഗംഗുഭായ് കത്തിയവാഡി’. ചിത്രത്തിന്റെ ടീസര്‍ നേരത്തേ തന്നെ ശ്രദ്ധ നേടിയിരുന്നു. വന്‍ മേക്കോവറിലാണ് ചിത്രത്തില്‍ ആലിയ ഭട്ട് എത്തുന്നത്.
1942 എ ലവ് സ്റ്റോറി, ഖാമോഷി, ദേവ്ദാസ്, ബ്ലാക്ക്, സാവരിയ, ഗുസാരിഷ്, ഭാജിറാവു മസ്താനി, പദ്മാവത് തുടങ്ങി ശ്രദ്ധേയ സിനിമകളിലൂടെ പ്രശസ്തനായ എഴുത്തുകാരനും സംവിധായകനുമായ സഞ്ജയ് ലീല ബന്‍സാലിയാണ് ചിത്രം അണിയിച്ചിരുക്കുന്നത്.

ഇപ്പോഴിതാ സഞ്ജയ് ലീലാ ബന്‍സാലിയും നിര്‍മ്മാതാവ് ഡോ. ജയന്തിലാല്‍ ഗഡാ(പെന്‍ സ്റ്റുഡിയോ)യും ‘ഗംഗുഭായ് കത്തിയവാഡി’യുടെ റിലീസ് തീയതി പ്രഖ്യാപിച്ചിരിക്കുകയാണ്. 2022 ഫെബ്രുവരി 18 ന് ചിത്രം തിയേറ്ററിലെത്തുമെന്നാണ് ഇരുവരും വ്യക്തമാക്കിയിരിക്കുന്നത്.

നേരത്തേ ഈ വര്‍ഷം ജൂലൈയില്‍ സിനിമയുടെ റിലീസ് പ്രഖ്യാപിച്ചിരുന്നുവെങ്കിലും കോവിഡ് കാരണം റിലീസ് മാറ്റിവെക്കുകയായിരുന്നു. വീണ്ടും ജനുവരി 6 -ന് റിലീസ് എന്ന് പ്രഖ്യാപിച്ചിരുന്നു.എന്നാല്‍ ഇതേ ദിവസം തന്നെയാണ് എസ്.എസ്. രാജമൗലിയുടെ ‘RRR’ന്റെയും റിലീസ്. രണ്ടിലേയും നായിക ആലിയാ ആയതുകൊണ്ട് മത്സരം ഒഴിവാക്കാന്‍ ബന്‍സാലിയും നിര്‍മ്മാതാവും സ്വയം പിന്‍മാറി റിലീസ് ഫെബ്രുവരിയിലേക്ക് മാറ്റുകയായിരുന്നു. ഇതിന് രാജമൗലി ട്വിറ്ററിലൂടെ ഇരുവര്‍ക്കും നന്ദി അറിയിച്ചു കൊണ്ട് ‘ഗംഗുഭായ് കത്തിയവാഡി’ക്ക് വിജയാശംസകളും നേര്‍ന്നു.

The decision by Mr. @JayantilalGada and Mr. #SanjayLeelaBhansali to move the release date is well appreciated. Our heartfelt wishes to #GangubaiKathiawadi..:)

— rajamouli ss (@ssrajamouli) November 15, 2021

മുംബൈയിലെ കാമാത്തിപുര ഭരിക്കുന്ന, മാഫിയാ ക്വീന്‍ എന്ന ശക്തമായ കഥാപാത്രത്തെയാണ് ആലിയ ചിത്രത്തില്‍ അവതരിപ്പിക്കുന്നത്. ഹുസൈന്‍ സെയ്ദിയുടെ മാഫിയ ക്യൂന്‍സ് ഓഫ് മുംബൈ എന്ന പുസ്തകത്തെ ആധാരമാക്കി ഒരുങ്ങുന്ന സിനിമയില്‍ കാമുകനാല്‍ ചതിക്കപ്പെട്ട് വ്യഭിചാര കേന്ദ്രമായ കാമാത്തിപുരയില്‍ എത്തിപ്പെടുന്ന ഒരു പെണ്‍കുട്ടിയുടെ ജീവിതം മാറിമറിയുന്ന വഴികളാണ് ചിത്രത്തില്‍ അവതരിപ്പിച്ചിരിക്കുന്നത്.

അജയ് ദേവ്ഗണും ഇമ്രാന്‍ ഹാഷ്മിയും ചിത്രത്തില്‍ അതിഥി വേഷത്തില്‍ എത്തുന്നുണ്ട്. ശന്തനു മഹേശ്വരി, വിജയ് റാസ്, ഹുമാ ഖുറേശി എന്നിവരും ചിത്രത്തില്‍ പ്രധാന വേഷങ്ങളില്‍ എത്തുന്നു. സുദീപ് ചാറ്റര്‍ജിയാണ് ക്യാമറ കൈകാര്യം ചെയ്യുന്നത്. സഞ്ജയ് ലീലാ ബന്‍സാലിയാണ് ചിത്രത്തിലെ ഗാനങ്ങള്‍ ഒരുക്കിയിട്ടുള്ളത്. ബന്‍സാലി പ്രൊഡക്ഷന്‍സും പെന്‍സ്റ്റുഡിയോസും ചേര്‍ന്നാണ് ‘ഗംഗുഭായ് കത്തിയവാഡി’ നിര്‍മ്മിച്ചിരിക്കുന്നത്. വാര്‍ത്താപ്രചരണം സി.കെ. അജയ് കുമാര്‍.