നിവിന്‍പോളി, അജുവര്‍ഗ്ഗീസ്, സിജു വില്‍സണ്‍, സൈജു കുറുപ്പ് എന്നിവരെ കേന്ദ്ര കഥാപാത്രങ്ങളാക്കി റോഷന്‍ ആന്‍ഡ്രൂസ് സംവിധാനം ചെയ്യുന്ന ചിത്രമാണ് സാറ്റര്‍ഡേ നൈറ്റ്‌സ്. യുവതലമുറയിലെ സൗഹൃദങ്ങളുടെ കഥ പറയുന്ന ചിത്രമാണിത്. ചിത്രത്തിന്റെ ഒഫീഷ്യല്‍ ട്രെയിലര്‍ ഇന്നലെ പുറത്തിറങ്ങി. മലയാള സിനിമാചരിത്രത്തിലാദ്യമായി ഒരു പബ്ബില്‍ വച്ചാണ് ട്രെയിലര്‍ ലോഞ്ച് നടന്നത്.
‘എല്ലാവര്‍ക്കും പറയാന്‍ ചില സൗഹൃദ കൂട്ടായ്മയുണ്ടാകും. എല്ലാ വിക്കെന്‍ഡുകളിലും അവര്‍ ഒന്നിച്ചു കൂടും. ഒളിമറയില്ലാതെ വിശേഷങ്ങള്‍ പങ്കുവയ്ക്കും. എനിക്കും ധാരാളം സൗഹൃദങ്ങള്‍ ഉണ്ടായിരുന്നു. ഈ സിനിമ ഷൂട്ട് ചെയ്തുകൊണ്ടിരിക്കുമ്പോള്‍ എനിക്ക് അവരെയാണ് ഓര്‍മ്മ വന്നത്. ഞാനവരെ ശരിക്കും മിസ്സ് ചെയ്യുന്നു. ഈ സിനിമ കണ്ട് കഴിയുമ്പോള്‍ നിങ്ങളും നിങ്ങളുടെ സൗഹൃദങ്ങളെ ഓര്‍ക്കുമെന്നുതന്നെയാണ് ഞാന്‍ കരുതുന്നത്. ഇതൊരു ഹ്യൂമര്‍ സിനിമയാണ്. ഹ്യൂമര്‍ മാത്രമല്ല, സൗഹൃദങ്ങള്‍ക്കിടയിലുണ്ടാകുന്ന എല്ലാ ഇമോഷന്‍സും ഈ സിനിമ ക്യാരി ചെയ്യുന്നുണ്ട്. വിവിധ ലൊക്കേഷനുകളിലായിട്ടാണ് ഈ ചിത്രം ഷൂട്ട് ചെയ്തത്. വളരെ എന്‍ജോയ് ചെയ്താണ് ഞങ്ങളെല്ലാവരും ചിത്രത്തില്‍ അഭിനയിച്ചത്.’ നിവിന്‍ പോളി പറഞ്ഞു. സ്റ്റാന്‍ലി എന്ന കഥാപാത്രത്തെയാണ് നിവിന്‍പോളി ചിത്രത്തില്‍ അവതരിപ്പിക്കുന്നത്.
‘കായംകുളം കൊച്ചുണ്ണി ചെയ്തുകൊണ്ടിരിക്കുമ്പോള്‍ ഒരു ഹ്യൂമര്‍ സിനിമ ചെയ്യണമെന്ന് ഞാന്‍ നിവിന്‍ പോളിയോട് പറയുമായിരുന്നു. അങ്ങനെയൊരു കഥ കിട്ടിയപ്പോള്‍ ഞാന്‍ ആദ്യം വിളിച്ചതും നിവിന്‍പോളിയെയാണ്.’ റോഷന്‍ ആന്‍ഡ്രൂസ് പറഞ്ഞു. കായംകുളം കൊച്ചുണ്ണിക്കുശേഷം നിവിന്‍പോളിയെ നായകനാക്കി റോഷന്‍ ആന്‍ഡ്രൂസ് സംവിധാനം ചെയ്യുന്ന ചിത്രംകൂടിയാണ് ഇത്.
അജിത്ത് വിനായക ഫിലിംസിന്റെ ബാനറില്‍ വിനായക അജിത്താണ് ചിത്രം നിര്‍മ്മിക്കുന്നത്.
ഗ്രേസ് ആന്റണി, സാനിയ ഇയ്യപ്പന്‍, മാളവിക, പ്രതാപ് പോത്തന്‍, ശാരി, വിജയ് മേനോന്‍, അശ്വിന്‍ മാത്യു തുടങ്ങിയവരും ചിത്രത്തില്‍ അഭിനയിക്കുന്നു. നവീന്‍ ഭാസ്‌കറാണ് സാറ്റര്‍ഡേ നൈറ്റിന്റെ തിരക്കഥ ഒരുക്കുന്നത്. ആഗസ്റ്റ് 17 ന് പുറത്തുവന്ന ചിത്രത്തിന്റെ ഫസ്റ്റ് ലുക്ക് പോസ്റ്ററും ഏറെ ശ്രദ്ധ നേടിയിരുന്നു. ഇപ്പോള്‍ ട്രെയിലറും ട്രെന്‍ഡിംഗ് ലിസ്റ്റില്‍ ഒന്നാമതാണ്.
Recent Comments