ചാലക്കുടിക്കാരന്‍ ചങ്ങാതിക്ക് ശേഷം സെന്തില്‍കൃഷ്ണ പ്രധാനവേഷത്തില്‍ അഭിനയിക്കുന്ന ഡാര്‍ക്ക് ക്രൈം ത്രില്ലര്‍ സിനിമയായ ഉടുമ്പിന്റെ ടീസര്‍ പുറത്തിറങ്ങി. പ്രേക്ഷകരെ മുള്‍മുനയില്‍ നിര്‍ത്തുന്ന രീതിയിലാണ് സിനിമയുടെ ടീസര്‍ തയ്യാറാക്കിയിരിക്കുന്നത്. ആക്ഷനും ത്രില്ലറിനും ഏറെ പ്രാധാന്യം നല്‍കുന്ന ടീസറില്‍ സെന്തിലിനോടൊപ്പം ഹരീഷ് പേരടിയും അലന്‍സിയറും പ്രധാന വേഷത്തില്‍ എത്തുന്നു. ‘ചാവുന്നോര്‍ക്കെല്ലാം ഒരേ നിര്‍ബ്ബന്ധമാടി ഞാന്‍തന്നെ കൊല്ലണമെന്ന്’ സെന്തില്‍കൃഷ്ണ പറയുന്ന ഡയലോഗോടുകൂടിയാണ് ടീസര്‍ അവസാനിക്കുന്നത്.
പട്ടാഭിരാമന്‍, മരട് 357 എന്നീ ചിത്രങ്ങള്‍ക്ക് ശേഷം കണ്ണന്‍ താമരക്കുളത്തിന്റെ സംവിധാനത്തില്‍ ഡോണുകളുടെയും, ഗാങ്സറ്റര്‍മാരുടെയും കഥ പറയുന്ന ചിത്രമാണ് ‘ഉടുമ്പ്.’ മലയാള സിനിമയില്‍ അധികം കാണാത്ത ഒരു വിഭാഗമാണ് ഡാര്‍ക്ക് ത്രില്ലറുകള്‍. ആ ശ്രേണിയില്‍പ്പെട്ട മികച്ച ചിത്രമായിരിക്കും ഉടുമ്പ് എന്ന് അതിന്റെ അണിയറക്കാര്‍ അവകാശപ്പെടുന്നു. എറണാകുളം, തിരുവനന്തപുരം എന്നിവിടങ്ങളാണ് ചിത്രത്തിന്റെ പ്രധാന ലൊക്കേഷന്‍. ചിത്രത്തിന്റെ ഷൂട്ടിംഗ് പുരോഗമിച്ചുവരികയാണ്.
ശ്രദ്ധേയനായ ഛായാഗ്രാഹകന്‍ രവിചന്ദ്രന്‍ ഛായാഗ്രഹണം നിര്‍വഹിക്കുമ്പോള്‍ സാനന്ദ് ജോര്‍ജ് ഗ്രേസ് ആണ് സംഗീതം ഒരുക്കുന്നത്. നവാഗതരായ അനീഷ് സഹദേവന്‍, ശ്രീജിത്ത് ശശിധരന്‍ എന്നിവര്‍ ചേര്‍ന്നാണ് ഉടുമ്പിന്റെ തിരക്കഥ രചിച്ചിരിക്കുന്നത്. 24 മോഷന്‍ ഫിലിംസും കെ.റ്റി മൂവി ഹൗസും ചേര്‍ന്നാണ് ചിത്രം നിര്‍മ്മിക്കുന്നത്. പ്രശസ്ത പ്രൊഡക്ഷന്‍ കണ്‍ട്രോളര്‍ ബാദുഷ ചിത്രത്തിന്റെ ലൈന്‍ പ്രൊഡ്യൂസറാവുന്നു.
നിരവധി ചിത്രങ്ങളിലൂടെ ശ്രദ്ദേയനായ വി.ടി ശ്രീജിത്ത് എഡിറ്റിങ് നിര്‍വഹിക്കുന്നു. വൈലന്‍സിന് ഏറെ പ്രാധാന്യമുള്ള ചിത്രത്തില്‍ ബ്രൂസ്ലീ രാജേഷ്, ശക്തി ശരവണന്‍ എന്നിവര്‍ ചേര്‍ന്നാണ് ആക്ഷന്‍ കൈകാര്യം ചെയ്യുന്നത്. കൊറിയോഗ്രഫി നിര്‍വ്വഹിച്ചിരിക്കുന്നത് പ്രസന്ന സുജിത്ത്, ഷിജു മുപ്പത്തേടം, ശ്രീജിത്ത് ശിവനന്ദന്‍ എന്നിവരാണ്. കലാ സംവിധാനം- സഹസ് ബാല, അസോസിയേറ്റ് ഡയറക്ടര്‍- സുരേഷ് ഇളമ്പല്‍, പ്രൊഡക്ഷന്‍ കണ്‍ഡ്രോളര്‍- അഭിലാഷ് അര്‍ജുന്‍, ഗാനരചന- രാജീവ് ആലുങ്കല്‍, മേക്കപ്പ്- പ്രദീപ് രംഗന്‍, കോസ്റ്റ്യൂം- സുല്‍ത്താന റസാഖ്, സ്റ്റില്‍സ്- ശ്രീജിത്ത് ചെട്ടിപ്പടി, പി.ആര്.ഒ- പി. ശിവപ്രസാദ്, സുനിത സുനില്‍.
ഫെബ്രുവരിയില്‍ ചിത്രം റിലീസ് ചെയ്യാനാണ് സാധ്യത.
Recent Comments