മെഡിക്കല്‍ കാംബസ് പശ്ചാത്തലത്തിലൂടെ ഹൊറര്‍ ത്രില്ലര്‍ ഒരുക്കുകയാണ് ഷാജി കൈലാസ് ഹണ്ട് എന്ന ചിത്രത്തിലൂടെ. മള്‍ട്ടി സ്റ്റാര്‍ ചിത്രങ്ങളാണ് ഏറെയും ഷാജി കൈലാസിന്റെ കൈയ്യൊപ്പ് പതിഞ്ഞവ. എന്നാല്‍ അതില്‍ നിന്നെല്ലാം തികച്ചും വ്യത്യസ്തമായ ഒരു സമീപനമാണ് ഈ ചിത്രത്തിനു വേണ്ടി ഷാജി കൈലാസ് സ്വീകരിച്ചിരിക്കുന്നത്. കാംബസ് കഥാപാത്രങ്ങള്‍ക്ക് അനുയോജ്യമായ അഭിനേതാക്കളെയാണ് അണിനിരത്തിയിരിക്കുന്നത്. മലയാളത്തിലെ ഏറ്റവും പുതിയ തലമുറക്കാരായ ഒരു കൂട്ടം ചെറുപ്പക്കാരുടെ നിര തന്നെ ഈ ചിത്രത്തിനായി അണിനിരക്കുന്നുണ്ട്.
രാഹുല്‍ മാധവ്, ഡെയ്ന്‍ ഡേവിഡ്, അജ്മല്‍ അമീര്‍, അനുമോഹന്‍, ചന്തുനാഥ് എന്നിവരാണ് ഇവരിലെ പ്രധാനികള്‍.
ഇവരെല്ലാം മെഡിക്കല്‍ വിദ്യാര്‍ത്ഥികളെ പ്രതിനിധാനം ചെയ്യുന്നു. ഡോ. കീര്‍ത്തി എന്ന കേന്ദ്ര കഥാപാത്രത്തെയാണ് ഭാവന അവതരിപ്പിക്കുന്നത്.
ഹൗസ് സര്‍ജന്‍സി കഴിഞ്ഞ് സര്‍വ്വീസ്സില്‍ പ്രവേശിക്കുന്ന ഗണത്തിലെ സീനിയറാണ് ഡോ. കീര്‍ത്തി. അവരുടെ മുന്നിലെത്തുന്ന ഒരു കൊലപാതകക്കേസ്സാണ് ഈ ചിത്രത്തിന്റെ കഥാഗതിയെ മുന്നോട്ടു നയിക്കുന്നത്. കാംബസ്സിനെ ആകെ സംഘര്‍ഷമാക്കിയ താണ് ഈ മര്‍ഡര്‍. മെഡിക്കല്‍ വിഭാഗവും പൊലീസും, അതിതീവ്രമായ അന്വേഷണമാണ് നടത്തിപ്പോന്നത്. അഴിക്കുംതോറും മുറുകുന്ന കുരുക്കുകളിലൂടെ ഏറെ ദുരൂഹതകള്‍ സൃഷ്ടിച്ചു കൊണ്ടായിരുന്നു ഈ കേസിന്റെ അന്വേഷണം. അന്വേഷണത്തിന്റെ ക്ലൈമാക്സ്സിലേക്കെത്തുമ്പോള്‍ വലിയ ദുരൂഹതകളാണ് ഈ ചിത്രത്തിലൂടെ പുറത്തുവരുന്നത്. പ്രേഷകനെ ഉദ്വേഗത്തിന്റെ മുള്‍മുനയില്‍ നിര്‍ത്തിക്കൊണ്ടാണ് ഷാജി കൈലാസ് ഈ ചിത്രത്തെ അവതരിപ്പിക്കുന്നത്.
‘ഹൊററും ആക്ഷനും, ക്രൈമും എല്ലാം കൂട്ടിച്ചേര്‍ത്ത് ഒരു ക്ലീന്‍ എന്റര്‍ടൈനറായിട്ടാണ് ഈ ചിത്രത്തിന്റെ അവതരണം. പാലക്കാട്, അഹല്യാ കോംപ്ലക്‌സിലായിരുന്നു ഈ ചിത്രത്തിന്റെ ഏറെയും ഭാഗങ്ങളും ചിത്രീകരിച്ചത്. സുഗമമായ ചിത്രീകരണത്തിന് ഇവിടം ഏറെ സുരക്ഷിതവും സൗകര്യവുമായിരുന്നു’ സംവിധായകന്‍ ഷാജി കൈലാസ് പറഞ്ഞു.
അതിഥിരവി, രണ്‍ജി പണിക്കര്‍ എന്നവര്‍ ഈ ചിത്രത്തിലെ മറ്റു രണ്ടു മുഖ്യമായ കഥാപാത്രങ്ങളെ അവതരിപ്പിക്കുന്നു. നന്ദു വിജയകുമാര്‍, ബിജു പപ്പന്‍, കോട്ടയം നസീര്‍, ജി. സുരേഷ് കുമാര്‍, കൊല്ലം തുളസി, സുധി പാലക്കാട്, കിജന്‍ രാഘവന്‍, ദിവ്യാ നായര്‍, സോനു എന്നിവരും പ്രധാന വേഷങ്ങളിലുണ്ട്.
തിരക്കഥ- നിഖില്‍ ആനന്ദ്, ഗാനങ്ങള്‍- സന്തോഷ് വര്‍മ്മ, ഹരിതാ രായണന്‍, സംഗീതം- കൈലാസ് മേനോന്‍,
ഛായാഗ്രഹണം ജാക്‌സന്‍ ജോണ്‍സണ്‍, എഡിറ്റിംഗ്- ഏ.ആര്- അഖില്‍, കലാസംവിധാനം- ബോബന്‍, കോസ്റ്റ്യൂം ഡിസൈന്‍- ലിജി പ്രേമന്‍, ചീഫ് അസ്സോസ്സിയേറ്റ് ഡയറക്ടര്‍- മനു സുധാകര്‍, ഓഫീസ് നിര്‍വ്വഹണം- ദില്ലി ഗോപന്‍, പ്രൊഡക്ഷന്‍ എക്‌സിക്കുട്ടീവ്‌സ്- പ്രതാപന്‍ കല്ലിയൂര്‍, ഷെറിന്‍ സ്റ്റാന്‍ലി, പ്രൊഡക്ഷന്‍ കണ്‍ട്രോളര്‍ സഞ്ജു ജെ, പി.ആര്.ഒ.- വാഴൂര്‍ ജോസ്, ഫോട്ടോ- ഹരി തിരുമല.
ജയലഷ്മി ഫിലിംസിന്റെ ബാനറില്‍ കെ. രാധാകൃഷ്ണന്‍ നിര്‍മ്മിക്കുന്ന ഈ ചിത്രത്തിന്റെ നിര്‍മ്മാണ പ്രവര്‍ത്തനങ്ങള്‍ പൂര്‍ത്തിയായി വരുന്നു. ഓഗസ്റ്റ് 9 ന് ഈ ഫോര്‍ എന്റെര്‍ടൈന്‍മെന്റ് പ്രദര്‍ശനത്തിനെത്തിക്കുന്നു.
Recent Comments