സാന്ദ്രാ തോമസ് പ്രൊഡക്ഷന്‍സിന്റെ ബാനറില്‍ നിര്‍മ്മിക്കുന്ന പുതിയ ചിത്രം ആന്റോ ജോസ് പെരേരയും എബി ട്രീസാപോളും ചേര്‍ന്ന് കഥയെഴുതി സംവിധാനം ചെയ്യുന്നു. ഏറെ ശ്രദ്ധിക്കപ്പെടുകയും ചര്‍ച്ച ചെയ്യപ്പെടുകയും ചെയ്ത മെംബര്‍ രമേശനു ശേഷം ആന്റോ ജോസ് പെരേരയും എബി ട്രീസാ പോളും സംവിധാനം ചെയ്യുന്ന ചിത്രമാണിത്. ടൈറ്റില്‍ ആയിട്ടില്ല. ചിത്രീകരണം ഒക്ടോബര്‍ 9 ന് കട്ടപ്പനയില്‍ ആരംഭിക്കും.
മലയോര മേഖലയുടെ പശ്ചാത്തലത്തിലാണ് കഥ പറയുന്നത്. ഇവിടുത്തെ ഏലത്തോട്ടങ്ങളുമായി ബന്ധപ്പെട്ട കര്‍ഷക കുടുംബങ്ങളാണ് കഥാപാത്രങ്ങള്‍. രണ്ടു കുടുംബങ്ങള്‍ക്കിടയില്‍ അരങ്ങേറുന്ന മൂന്നു പ്രണയങ്ങളാണ് ചിത്രത്തിന്റെ പ്രമേയം. പൂര്‍ണ്ണമായും ഒരു കളര്‍ഫുള്‍ കോമഡി എന്റര്‍ടെയിനര്‍.
ഷെയ്ന്‍ നിഗവും ഷൈന്‍ ടോം ചാക്കോയുമാണ് കേന്ദ്രകഥാപാത്രങ്ങളെ അവതരിപ്പിക്കുന്നത്. ഭീഷ്മപര്‍വ്വം എന്ന ചിത്രത്തിലൂടെ ശ്രദ്ധേയയായ അനഘ മരുതോരയാണ് നായിക. ബാബുരാജ്, ചെമ്പന്‍ വിനോദ് ജോസ്, രഞ്ജി പണിക്കര്‍, ജാഫര്‍ ഇടുക്കി, രമ്യാ സുവി, മാലാ പാര്‍വ്വതി എന്നിവരും പ്രധാന വേഷത്തിലെത്തുന്നു.
തിരക്കഥ രാജേഷ് പിന്നാടന്‍, സംഗീതം കൈലാസ്, ഛായാഗ്രഹണം ലൂക്ക് ജോസ്, എഡിറ്റിംഗ് നൗഫല്‍ അബ്ദുള്ള, കലാസംവിധാനം അരുണ്‍ ജോസ്, മേക്കപ്പ് പ്രദീപ് ഗോപാലകൃഷ്ണന്‍, കോസ്റ്റ്യും ഡിസൈന്‍ അരുണ്‍ മനോഹര്‍, ക്രിയേറ്റീവ് ഡയറക്ടര്‍ ദിപില്‍ ദേവ്, ക്രിയേറ്റീവ് ഹെഡ് ഗോപികാ റാണി, പ്രൊഡക്ഷന്‍ ഹെഡ് അനിതാ രാജ് കപില്‍, ഡിസൈന്‍ എസ് ത്തറ്റിക് കുഞ്ഞമ്മ, പ്രൊഡക്ഷന്‍ കണ്‍ട്രോളര്‍ ഡേവിസണ്‍ സി.ജെ., പി.ആര്‍.ഒ വാഴൂര്‍ ജോസ്.
Recent Comments