രജനികാന്തിനെ നായകനാക്കി നെല്‍സണ്‍ ദിലീപ് കുമാര്‍ സംവിധാനം ചെയ്യുന്ന ചിത്രമാണ് ജയിലര്‍. ആഗസ്റ്റ് 10 ന് റിലീസ് ചെയ്യാനിരിക്കെ ചിത്രത്തിന്റെ ചെറു വീഡിയോ പുറത്തുവിട്ടിരിക്കുകയാണ് അണിയറപ്രവര്‍ത്തകര്‍. മുത്തുവേല്‍ പാണ്ഡ്യന്‍ എന്ന ജയിലറുടെ വേഷമാണ് താരം കൈകാര്യം ചെയ്യുന്നത്. രജനിയുടെ ആക്ഷന്‍ രംഗങ്ങളാണ് വീഡിയോയില്‍ കാണാന്‍ കഴിയുക. രജനിയുടെ 169-ാമത് ചിത്രംകൂടിയാണിത്.
സണ്‍ പിക്‌ചേഴ്‌സിന്റെ ബാനറില്‍ കലാനിധിമാരന്‍ നിര്‍മ്മിക്കുന്ന ജയിലറില്‍ മോഹന്‍ലാലും ഒരു സുപ്രധാന വേഷം ചെയ്യുന്നുണ്ട്. രജനികാന്തിനൊപ്പം മോഹന്‍ലാല്‍ ആദ്യമായി അഭിനയിക്കുന്നുവെന്ന പ്രത്യേകതയും ചിത്രത്തിനുണ്ട്.
തമന്ന, രമ്യാകൃഷ്ണന്‍, ശിവരാജ് കുമാര്‍, ജാക്കി ഷ്‌റോഫ്, വിനായകന്‍, സുനില്‍ തുടങ്ങി മുന്‍നിര താരങ്ങളും ചിത്രത്തില്‍ അണിനിരക്കുന്നുണ്ട്. അനിരുദ്ധാണ് സംഗീതം ഒരുക്കുന്നത്.
ശ്രീഗോകുലം മൂവീസിന്റെ ബാനറില്‍ ഗോകുലം ഗോപാലനാണ് ജയിലറിന്റെ കേരളത്തിലെ വിതരണാവകാശം. ലൈക്കാ പ്രൊഡക്ഷന്‍സിന്റെ ബാനറില്‍ നിര്‍മ്മിച്ച ആറ് ചിത്രങ്ങളും കേരളത്തിലെത്തിച്ചതും ഗോകുലം ഗോപാലനാണ്. പ്രദര്‍ശനത്തിനൊരുങ്ങുന്ന വിജയ് ചിത്രം ലിയോ വിതരണത്തിനെത്തിക്കുന്നതും ഗോകുലം മൂവീസാണ്.
Recent Comments