അന്തരിച്ച സംവിധായകനും ഛായാഗ്രാഹകനുമായ ശിവനെക്കുറിച്ചുള്ള ഡോക്യുമെന്ററിയാണ് ശിവനയനം. ശിവന്റെ മകന്‍ കൂടിയായ സന്തോഷ് ശിവനാണ് ഡോക്യുമെന്ററിയുടെ സംവിധായകന്‍. കേരള മീഡിയ അക്കാദമിയാണ് ശിവനയനം നിര്‍മ്മിച്ചിരിക്കുന്നത്. ഇതിന്റെ ട്രെയിലര്‍ ജൂലൈ 1 ന് നടന്‍ പൃഥ്വിരാജ് തന്റെ ഫേസ്ബുക്ക് വഴി റിലീസ് ചെയ്യും. അന്ന് ശിവന്റെ സഞ്ചയനദിനംകൂടിയാണ്.
ഏതാണ്ട് ഒന്നരവര്‍ഷം മുമ്പാണ് മീഡിയ അക്കാദമി ചെയര്‍മാന്‍ ആര്‍.എസ്. ബാബു ഈദൗത്യം സന്തോഷ്ശിവനെ ഏല്‍പ്പിക്കുന്നത്. പല ഇടവേളകളെടുത്ത് സന്തോഷ് ശിവന്‍ ഈ ഡോക്യുമെന്ററി പൂര്‍ത്തിയാക്കുകയും ചെയ്തു. എം.ടി. വാസുദേവന്‍നായര്‍, മണിരത്‌നം, ഷാജി എന്‍. കരുണ്‍, മോഹന്‍ലാല്‍, പൃഥ്വിരാജ് അങ്ങനെ ഒരുപാട് പ്രമുഖര്‍ ഈ ഡോക്യുമെന്ററിയുടെ ഭാഗമാകുന്നുണ്ട്.
കേരള മീഡിയ അക്കാദമി അവിടുത്തെ റഫറന്‍സ് ആവശ്യങ്ങള്‍ക്ക് കൂടി ഉതകുന്ന നിലയ്ക്കാണ് ഡോക്യുമെന്ററി സീരീസ് നിര്‍മ്മിക്കുന്നത്. പല പ്രമുഖരുടെയും ഡോക്യൂമെന്ററികള്‍ ഇത്തരത്തില്‍ പണിപ്പുരയിലാണ്. ഈ ഡോക്യുമെന്ററിയെല്ലാം ഒരുമിച്ച് റിലീസ് ചെയ്യാനായിരുന്നു അക്കാദമി പദ്ധതിയിട്ടിരുന്നത്.
ശിവന്റെ വിയോഗത്തെ തുടര്‍ന്ന് അദ്ദേഹത്തിനോടുള്ള ആദരസൂചകമായിട്ടാണ് ശിവനയനത്തിന്റെ ട്രെയിലര്‍ റിലീസ് ചെയ്യാന്‍ അക്കാദമി തീരുമാനമെടുത്തത്. വൈകാതെ ഒരു വലിയ ചടങ്ങില്‍വച്ച് ഡോക്യുമെന്ററിയുടെ പൂര്‍ണ്ണഭാഗം നടന്‍ മോഹന്‍ലാല്‍ റിലീസ് ചെയ്യും.
Recent Comments