നാനി നായകനായി എത്തുന്ന ഏറ്റവും പുതിയ ചിത്രമാണ് സൂര്യാസ് സാറ്റര്‍ഡേ. വിവേക് ആത്രേയ രചിച്ച് സംവിധാനം ചെയ്യുന്ന ഈ പാന്‍ ഇന്ത്യന്‍ ചിത്രത്തില്‍ നായികയായി എത്തുന്നത് പ്രിയങ്ക മോഹനനാണ്. ഇപ്പോഴിതാ, ഡിവിവി എന്റര്‍ടൈന്‍മെന്റ് നിര്‍മ്മിക്കുന്ന ഈ ചിത്രത്തിലെ മറ്റൊരു നിര്‍ണ്ണായക വേഷം ചെയ്യുന്ന എസ് ജെ സൂര്യയുടെ ഒരു സ്‌പെഷ്യല്‍ വീഡിയോ റിലീസ് ചെയ്തിരിക്കുകയാണ്. ‘നോട്ട് എ ടീസര്‍’ എന്ന പേരിലാണ് ഈ വീഡിയോ റിലീസ് ചെയ്തിരിക്കുന്നത്. എസ് ജെ സൂര്യയുടെ ജന്മദിനം പ്രമാണിച്ചാണ് ഈ സ്‌പെഷ്യല്‍ വീഡിയോ റിലീസ് ചെയ്തിരിക്കുന്നത്. ശക്തമായ ഒരു വിവരണത്തോടെ ആരംഭിക്കുന്ന വീഡിയോയില്‍ നരകാസുര പരിവേഷത്തിലാണ് എസ് ജെ സൂര്യ കഥാപാത്രത്തെ അവതരിപ്പിക്കുന്നത്. കൃഷ്ണ പരിവേഷത്തില്‍ നാനിയും സത്യഭാഷ പരിവേഷത്തില്‍ പ്രിയങ്കയും എത്തുന്നു.
ക്രൂരനായ ഒരു പോലീസ് ഓഫീസറായാണ് എസ് ജെ സൂര്യ ഈ ചിത്രത്തില്‍ വേഷമിടുന്നത്. ചാരുലത എന്ന് പേരുള്ള ഒരു നിഷ്‌കളങ്കയായ പോലീസ് കഥാപാത്രമായാണ് പ്രിയങ്ക ഈ ചിത്രത്തില്‍ പ്രത്യക്ഷപ്പെടുന്നത്. സൂപ്പര്‍ ഹിറ്റായ ഗ്യാങ് ലീഡറിന് ശേഷം വീണ്ടും നാനി- പ്രിയങ്ക മോഹന്‍ ടീമൊന്നിക്കുന്ന ചിത്രം കൂടിയാണിത്. ത്രില്ലടിപ്പിക്കുന്ന ഒരു ആക്ഷന്‍- അഡ്വെഞ്ചര്‍ ചിത്രമായാണ് വിവേക് ആത്രേയ സൂര്യാസ് സാറ്റര്‍ഡേ ഒരുക്കുന്നത്.
ഡിവിവി ദാനയ്യ, കല്യാണ്‍ ദസരി എന്നിവര്‍ ചേര്‍ന്ന് ഡിവിവി എന്റെര്‍റ്റൈന്മെന്റിന്റെ ബാനറില്‍ നിര്‍മ്മിക്കുന്ന ഈ ബിഗ് ബഡ്ജറ്റ് ചിത്രത്തിലെ മറ്റൊരു നിര്‍ണ്ണായക കഥാപാത്രത്തിന് ജീവന്‍ പകരുന്നത് സായ് കുമാര്‍ ആണ്. മുരളി ജി കാമറ ചലിപ്പിക്കുന്ന ഈ ചിത്രത്തിന് സംഗീതമൊരുക്കുന്നത് മലയാളിയായ ജേക്‌സ് ബിജോയ് ആണ്. കാര്‍ത്തിക ശ്രീനിവാസ് എഡിറ്റിങ് നിര്‍വഹിക്കുന്ന ഈ ചിത്രം തെലുങ്ക്, കന്നഡ, മലയാളം, തമിഴ്, ഹിന്ദി ഭാഷകളിലായി ഓഗസ്റ്റ് 29- ന് റിലീസ് ചെയ്യും. അവസാന ഘട്ട ചിത്രീകരണം നടക്കുന്ന ചിത്രത്തിന് വേണ്ടി സംഘട്ടന സംവിധാനം നിര്‍വഹിക്കുന്നത് റാം- ലക്ഷ്മണ്‍ ടീമാണ്. പിആര്‍ഒ ശബരി.
Recent Comments