ഒടിടി റിലീസിന് ഒരുങ്ങുന്ന ‘കേശു ഈ വീടിന്റെ നാഥന്‍’ എന്ന ചിത്രത്തിന്റെ രണ്ടാമത്തെ ഗാനം റിലീസായി. നാദിര്‍ഷയുടെ സംവിധാനത്തില്‍ ദിലീപ് നായകനായ ചിത്രത്തിലെ ‘നാരങ്ങ മിട്ടായി’ എന്ന് തുടങ്ങുന്ന ആദ്യ ഗാനം ട്രെന്‍ഡ് ചാര്‍ട്ടില്‍ ഇടം നേടിയിരുന്നു. ദിലീപും ടോപ് സിങ്ങര്‍ റിയാലിറ്റി ഷോയിലെ കുട്ടിപ്പാട്ടുകാരും ചേര്‍ന്നായിരുന്നു ആദ്യഗാനം ആലപിച്ചിരുന്നത്.
ചിത്രത്തിലെ രണ്ടാമത്തെ വീഡിയോ ഗാനമാണ് ഇപ്പോള്‍ പുറത്തിറങ്ങിയിരിക്കുന്നത്. ”പുന്നാരപൂങ്കാട്ടില്‍..” എന്ന് തുടങ്ങുന്ന ഗാനം ആലപിച്ചിരിക്കുന്നത് യേശുദാസാണ്. സുജേഷ് ഹരിയുടേതാണ് വരികള്‍. സംഗീതം നാദിര്‍ഷ. ഈ ഗാനവും ട്രെന്‍ഡിംഗ് ചാര്‍ട്ടിലേയ്ക്ക് കുതിക്കുകയാണ്.
അമര്‍ അക്ബര്‍ അന്തോണി, കട്ടപ്പനയിലെ ഹൃതിക് റോഷന്‍, മേരാ നാം ഷാജി തുടങ്ങിയ ചിത്രങ്ങള്‍ക്കു ശേഷം നാദിര്‍ഷ ഒരുക്കുന്ന ചിത്രമാണിത്. കുടുംബപശ്ചാത്തലത്തില്‍ നര്‍മ്മപ്രാധാന്യമുള്ള ഒരു കഥ പറയുന്നു.
ചിത്രത്തിലെ ദിലീപിന്റെ മേക്കോവറും ഇതിനോടകം ശ്രദ്ധ നേടിയിരുന്നു. രണ്ട് വ്യത്യസ്ത ഗെറ്റപ്പുകളിലാണ് ദിലീപ് പ്രത്യക്ഷപ്പെടുന്നത്.
ഉര്‍വശിയാണ് നായിക. സിദ്ധിഖ്, സലീംകുമാര്‍, ഹരിശ്രീ അശോകന്‍, കലാഭവന്‍ ഷാജോണ്‍, ഹരീഷ് കണാരന്‍, ശ്രീജിത്ത് രവി, ജാഫര്‍ ഇടുക്കി, കോട്ടയം നസീര്‍, ഗണപതി, അനുശ്രീ, സ്വാസിക തുടങ്ങിയവരും പ്രധാന വേഷത്തിലെത്തുന്നു.
സജീവ് പാഴൂര്‍ തിരക്കഥയെഴുതുന്ന ചിത്രത്തിന്റെ നിര്‍മ്മാണം നാഥ് ഗ്രൂപ്പാണ്. ഛായാഗ്രഹണം അനില്‍ നായര്‍. ചിത്രം ഡിസ്നി പ്ലസ് ഹോട്ട്സ്റ്റാറില്‍ സ്ട്രീമിങ് ചെയ്യും.
Recent Comments