വ്യത്യസ്ത ഭാവാഭിനയത്താല്‍ വിസ്മയം തീര്‍ക്കുന്ന നടനാണ് സുധീര്‍ കരമന. ഇപ്പോഴിതാ മറ്റൊരു കരുത്തുറ്റ കഥാപാത്രമായി ഉടുപ്പിലും.
കലാമൂല്യവും ജനപ്രിയവുമായ ഒരുപിടി ചിത്രങ്ങള്‍ മലയാളികള്‍ക്ക് സമ്മാനിച്ച പ്രശസ്ത തിരക്കഥാകൃത്ത് അനില്‍ മുഖത്തല ആദ്യമായി സംവിധാനം ചെയ്യുന്ന ചിത്രമാണ് ഉടുപ്പ്. നല്ല ചിത്രങ്ങള്‍ ഒരുക്കിയ മറ്റൊരു ചലച്ചിത്ര പ്രതിഭയായ അശോക് ആര്‍. നാഥാണ് ഈ ചിത്രത്തിന് തിരക്കഥ ഒരുക്കിയിരിക്കുന്നത്. സുധീര്‍ കരമന കേന്ദ്രകഥാപാത്രമാകുന്ന ചിത്രമാണ് ഉടുപ്പ്.
സമാനതകളില്ലാത്ത വേഷപ്പകര്‍ച്ചകളിലൂടെ മലയാളികളെ അത്ഭുതപ്പെടുത്തുന്ന നടന്‍ ഇന്ദ്രന്‍സും ഉടുപ്പില്‍ മികച്ച വേഷം ചെയ്യുന്നുണ്ട്. ഒപ്പം നടി സോനാനായരും.
ആക്ഷനും സസ്‌പെന്‍സും ത്രില്ലറും നിറഞ്ഞ ‘ഉടുപ്പ്’ ഒരു ഫാമിലി എന്റര്‍ടെയ്‌നര്‍ കൂടിയാണ്.
കാശുണ്ടാക്കണമെന്ന അമിതമായ ഒരാളുടെ ആര്‍ത്തിയിലൂടെ സമൂഹത്തില്‍ നിലനില്‍ക്കുന്ന അഴിമതിയിലേക്കും മറ്റ് സാമ്പത്തിക കുറ്റകൃത്യങ്ങളിലേക്കും ചൂണ്ടിക്കാണിക്കുന്ന പ്രമേയം കൂടിയാണ് ഉടുപ്പിന്റേതെന്ന് സംവിധായകന്‍ പറഞ്ഞു. എല്ലാത്തരം പ്രേക്ഷകരെയും രസിപ്പിക്കുകയും ചെയ്യുമ്പോഴും ചിത്രം ജീവിതത്തിലെ ചില മൂല്യങ്ങളിലേക്ക് വിരല്‍ ചൂണ്ടുന്നുണ്ടെന്ന് തിരക്കഥാകൃത്ത് അശോക് ആര്‍ നാഥ് പറഞ്ഞു. ചിത്രീകരണം പൂര്‍ത്തിയായ ഉടുപ്പ് മലയാളത്തിലെ പ്രമുഖ ഒടിടി പ്ലാറ്റ്‌ഫോമില്‍ റിലീസ് ചെയ്യും.
കൊച്ചുപ്രേമന്‍, വഞ്ചിയൂര്‍ പ്രവീണ്‍, സുര്‍ജിത്ത്, മായ, സിന്ധു, റീന എന്നിവരാണ് മറ്റ് അഭിനേതാക്കള്‍. ബാനര്‍-ജനസൂര്യ സിനിമാസ്, നിര്‍മ്മാണം- സൂര്യനാരായണന്‍, ക്യാമറ- സുനില്‍ പ്രേം, ആര്‍ട്ട്-പാവുമ്പ മനോജ്, എഡിറ്റര്‍-സുജേഷ് എസ്, മേക്കപ്പ്-ലാല്‍ കരമന, പശ്ചാത്തല സംഗീതം-വിശ്വജിത്ത് കവിത- പ്രകാശ് കല്ല്യാണി, വസ്ത്രാലങ്കാരം-അജി കഴക്കൂട്ടം, പ്രൊഡക്ഷന്‍ കണ്‍ട്രോളര്‍-പ്രകാശ് തിരുവല്ല, ശബ്ദമിശ്രണം-കൃഷ്ണനുണ്ണി, പി ആര്‍ ഒ- പി ആര്‍ സുമേരന്‍.
Recent Comments