മിമിക്രി വേദിയില്‍നിന്നും എത്തിയ താരമാണ് സുരാജ് വെഞ്ഞാറമ്മൂട്. മിമിക്രിയിലൂടെയാണ് സിദ്ധിക്കിന്റെയും തുടക്കം. സ്ലാപ്സ്റ്റിക് കോമഡിയിലൂടെ രണ്ടുപേരും പ്രേക്ഷകരെ ആവോളം ചിരിപ്പിച്ചിട്ടുമുണ്ട്. പിന്നീടിരുവരും ട്രാക്ക് മാറ്റി. ഗൗരവമുള്ള കഥാപാത്രങ്ങളിലേയ്ക്ക് വഴിമാറി. സിദ്ധിക്ക് പ്രതിനായക വേഷങ്ങളിലൂടെ വേറിട്ട് നടന്നപ്പോള്‍ ദേശീയ പുരസ്‌കാരവേദിയിലെത്താന്‍ സുരാജ് സൂക്ഷ്മാഭിനയത്തിലേയ്ക്ക് നടന്നടുത്തു. നായകനായും പ്രതിനായകനായും സ്വഭാവനടനായുമൊക്കെ അരങ്ങ് തകര്‍ക്കുന്നിടയിലാണ് തീര്‍ത്തും ഹ്യൂമര്‍ വേഷങ്ങളില്‍ ഇരുവരും പ്രത്യക്ഷപ്പെടാന്‍ പോകുന്നത്. സിദ്ധിക്കും സുരാജും കേന്ദ്രകഥാപാത്രങ്ങളെ അവതരിപ്പിക്കുന്ന ‘ന്നാലും എന്റളിയാ’ എന്ന ചിത്രം നാളെ തീയേറ്ററുകളില്‍ എത്തുകയാണ്. പ്രേക്ഷകര്‍ക്ക് ചിരി നല്‍കാനുള്ള എല്ലാ കൂട്ടുകളും ചിത്രത്തിലുണ്ടെന്ന് സിദ്ധിക്കും സുരാജും സാക്ഷ്യപ്പെടുത്തുന്നു. ഇവര്‍ക്കൊപ്പം കൂടുന്നത് ലെനയും ഗായത്രിയുമാണ്.
ചിത്രത്തിന്റെ പ്രൊമോഷനുവേണ്ടി സിദ്ധിക്കും സുരാജും ചേര്‍ന്ന് ഒരുക്കിയ ചെറു വീഡിയോയും ഇതിനോടകം പ്രേക്ഷകശ്രദ്ധ നേടിയിരുന്നു. ഇരുവരും പരസ്പരം ട്രോളിയാണ് ചെറുവീഡിയോയെ ഹിറ്റാക്കിയത്. തീയേറ്ററുകളില്‍ പ്രേക്ഷകരുടെ അഭിപ്രായം തേടിപ്പോകുന്ന ചില ഓണ്‍ലൈന്‍ മാധ്യമങ്ങളെ പരോക്ഷമായി ഈ വീഡിയോ വിമര്‍ശിക്കുന്നുമുണ്ട്.
ബാഷ് മുഹമ്മദ് സംവിധാനം ചെയ്യുന്ന ചിത്രത്തിന് സംഭാഷണം എഴുതിയിരിക്കുന്നത് ശ്രീകുമാര്‍ അറയ്ക്കലാണ്. ലിസ്റ്റിന്‍ സ്റ്റീഫനാണ് ചിത്രത്തിന്റെ നിര്‍മ്മാതാവും വിതരണക്കാരനും.
Recent Comments