ഗരുഡന്റെ സൂപ്പര്‍ഹിറ്റ് വിജയത്തിനുശേഷം സുരേഷ് ഗോപിയുടെ 257-ാമത്തെ ചിത്രം പ്രഖ്യാപിച്ചു. സനല്‍ വി. ദേവനാണ് ചിത്രം സംവിധാനം ചെയ്യുന്നത്. സുരേഷ് ഗോപിക്കൊപ്പം സുരാജ് വെഞ്ഞാറമൂടും ഗൗതം വാസുദേവ് മേനോനും മുഖ്യ കഥാപാത്രങ്ങളെ അവതരിപ്പിക്കുന്നു. കൂടുതല്‍ താരങ്ങളെ വരും ദിവസങ്ങളില്‍ പ്രഖ്യാപിക്കും. ചിത്രത്തിന്റെ പൂജ ഡിസംബര്‍ 15 ന് എറണാകുളത്ത് നടക്കും. തൊട്ടുപിന്നാലെ ചിത്രീകരണവും ആരംഭിക്കും.
കുഞ്ഞമ്മിണീസ് ഹോസ്പിറ്റല്‍ എന്ന ചിത്രത്തിനുശേഷം സനല്‍ വി. ദേവന്‍ സംവിധാനം ചെയ്യുന്ന രണ്ടാമത്തെ ചിത്രം കൂടിയാണിത്. ഇന്ദ്രജിത്ത്, നൈല ഉഷ, ബാബുരാജ് തുടങ്ങിയവര്‍ അഭിനയിച്ച ചിത്രമായിരുന്നു കുഞ്ഞമ്മിണീസ് ഹോസ്പിറ്റല്‍. സനലിന്റെ ഭാര്യയാണ് നടി സരയൂ.
ജിത്തു കെ. ജയന്റെയും മനു സി. കുമാറിന്റെയും കഥയ്ക്ക് തിരക്കഥയും സംഭാഷണവും എഴുതുന്നത് മനു സി. കുമാറാണ്. ഒരു ത്രില്ലര്‍ ചിത്രമാണിത്.
ഒരു പുതിയ നിര്‍മ്മാണ കമ്പനി കൂടി മലയാള സിനിമയിലേയ്ക്ക് കടന്നുവരികയാണ്. മാവെറിക് മൂവിസ് പ്രൈവറ്റ് ലിമിറ്റഡ് എന്നാണ് നിര്‍മ്മാണ കമ്പനിയുടെ പേര്. മുംബയ് ആണ് ഇവരുടെ ആസ്ഥാനം. കമ്പനിയുടെ ആദ്യ നിര്‍മ്മാണ സംരംഭമാണിത്. മലയാളത്തില്‍ കൂടുതല്‍ ചിത്രങ്ങള്‍ അവര്‍ ചെയ്യാന്‍ ഒരുങ്ങുകയാണ്. അതിന്റെ തുടക്കം എന്ന നിലയിലാണ് സുരേഷ് ഗോപിയുടെ ഈ ബ്രഹ്‌മാണ്ഡ ചിത്രം നിര്‍മ്മിക്കുന്നതും. സഞ്ജയ് പടിയൂരും നിര്‍മ്മാണ പങ്കാളിയാണ്. മലയാള സിനിമയിലെ പരിചയസമ്പന്നനായ പ്രൊഡക്ഷന്‍ കണ്‍ട്രോളര്‍ കൂടിയാണ് സഞ്ജയ് പടിയൂര്‍.
അജയ് ഡേവിഡ് കാച്ചാപ്പള്ളിയാണ് ഛായാഗ്രാഹകന്‍. രാഹുല്‍ രാജ് സംഗീതം നിര്‍വ്വഹിക്കുന്ന ചിത്രത്തിന്റെ എഡിറ്റര്‍ മന്‍സൂര്‍ മുത്തുട്ടിയും കലാസംവിധായകന്‍ സുനില്‍ കെ. ജോര്‍ജും ആണ്. കോ പ്രൊഡ്യൂസര്‍ മനോജ് ശ്രീകണ്ഠ, എക്‌സിക്യൂട്ടീവ് പ്രൊഡ്യൂസേഴ്‌സ് രാജ് സിംഗ്, കൃഷ്ണകുമാര്‍. ലൈന്‍ പ്രൊഡ്യൂസര്‍ ആര്യന്‍ സന്തോഷ്, കോസ്റ്റിയൂം നിസാര്‍ റഹ്‌മത്ത്, മേക്കപ്പ് റോണക്‌സ് സേവ്യര്‍, പ്രൊഡക്ഷന്‍ കണ്‍ട്രോളര്‍ പൗലോസ് കുറുമട്ടം, പ്രൊഡക്ഷന്‍ എക്‌സിക്യൂട്ടീവ് അഭിലാഷ് പൈങ്ങോഡ്.
Recent Comments