രാമലീലയ്ക്കുശേഷം ദിലീപിനെ നായകനാക്കി അരുണ്‍ ഗോപി ചെയ്യുന്ന ചിത്രത്തിന്റെ പൂജ കൊട്ടാരക്കര മഹാഗണപതി ക്ഷേത്രത്തില്‍ വച്ച് നടന്നു. ദിലീപാണ് ചടങ്ങിന് ആദ്യ ഭദ്രദീപം തെളിയിച്ചത്. തുടര്‍ന്ന് നിര്‍മ്മാതാവ് വിനായക അജിത്, സംവിധായകന്‍ അരുണ്‍ ഗോപി, തിരക്കഥാകൃത്ത് ഉദയകൃഷ്ണ, നടന്‍ സിദ്ധിക്ക് എന്നിവരും വിളക്ക് തെളിയിച്ചു.
പ്രശസ്ത ബോളിവുഡ് താരം തമന്നയാണ് ചിത്രത്തില്‍ ദിലീപിന്റെ നായിക. തമന്നയുടെ മലയാളത്തിലെ അരങ്ങേറ്റ ചിത്രംകൂടിയാണിത്. തമന്നയും ദിലീപിനൊപ്പം പൂജാച്ചടങ്ങില്‍ പങ്കെടുത്തിരുന്നു. ഫസ്റ്റ് ക്ലാപ്പ് നിര്‍വ്വഹിച്ചതും തമന്നയായിരുന്നു.
വന്‍ മുതല്‍മുടക്കില്‍ ഒരുങ്ങുന്ന ഒരു പാന്‍ ഇന്ത്യന്‍ ചിത്രമായിരിക്കുമിത്. ദിലീപിനും തമന്നയ്ക്കും പുറമേ ദക്ഷിണേന്ത്യന്‍ ഭാഷകളിലേയും ബോളിവുഡിലേയും പ്രമുഖ താരങ്ങളും ഈ ചിത്രത്തിന്റെ ഭാഗമാകും. സെപ്തംബര്‍ 15 ന് ഷൂട്ടിംഗ് ആരംഭിക്കും. ഗുജറാത്തും മുംബൈയും ജാര്‍ഖണ്ഡുമാണ് പ്രധാന ലൊക്കേഷനുകള്‍. പുര്‍ണ്ണമായും ഉത്തരേന്ത്യന്‍ പശ്ചാത്തലത്തിലാണ് കഥ നടക്കുന്നത്. ഉദയകൃഷണയാണ് കഥാകാരന്‍.
അജിത് വിനായക ഫിലിംസിന്റെ ബാനറില്‍ വിനായക അജിത്താണ് ഈ ചിത്രം നിര്‍മ്മിക്കുന്നത് സംഗീതം സാം സി.എസ്., ഷാജികുമാറാണ് ഛായാഗ്രാഹകന്‍.
എഡിറ്റിംഗ് വിവേക് ഹര്‍ഷന്‍, കോസ്റ്റ്യും ഡിസൈനര്‍ പ്രവീണ്‍ വര്‍മ്മ,
മേക്കപ്പ് രഞ്ജിത്ത് അമ്പാടി, ചീഫ് അസ്സോസ്സിയേറ്റ് ഡയറക്ടര്‍ രതീഷ് പാലോട്, അസോസ്സിയേറ്റ് ഡയറക്ടര്‍ റാം പാര്‍ത്ഥന്‍, പ്രൊഡക്ഷന്‍ എക്‌സിക്യൂട്ടീവ് ഷിഹാബ് വെണ്ണല, പ്രൊജക്റ്റ് ഡിസൈനര്‍ നോബിള്‍ ജേക്കബ്, ഫോട്ടോ രാംദാസ് മാത്തൂര്‍, വാര്‍ത്താപ്രചരണം വാഴൂര്‍ ജോസ്.
Recent Comments