ഉലകനായകന്‍ കമല്‍ ഹാസനെ നേരില്‍ കണ്ട സന്തോഷത്തില്‍ യഥാര്‍ത്ഥ മഞ്ഞുമ്മല്‍ ബോയ്‌സ് ടീം. മഞ്ഞുമ്മല്‍ ബോയ്‌സില്‍ സൗബിന്‍ സാഹിര്‍ അവതരിപ്പിച്ച കുട്ടേട്ടന്‍ എന്ന കഥാപാത്രത്തിന് പ്രചോദനമായ സിജു ഡേവിഡാണ് ഉലകനായകന്‍ കമല്‍ഹാസനെ നേരില്‍ കണ്ട സന്തോഷം പങ്കുവച്ചത്. കമലിനൊപ്പം മഞ്ഞുമ്മല്‍ സുഹൃത്തുക്കള്‍ നില്‍ക്കുന്ന ചിത്രവും സിജു സമൂഹമാധ്യമങ്ങളില്‍ പങ്കുവച്ചിട്ടുണ്ട്.
സിനിമ ഹിറ്റായതോടെ മഞ്ഞുമ്മല്‍ ബോയ്‌സ് താരങ്ങള്‍ക്കൊപ്പം യഥാര്‍ത്ഥ മഞ്ഞുമ്മ ബോയ്‌സിനും ആരാധകര്‍ ഉണ്ടായിരിക്കുകയാണ്. ഇതിനിടെയാണ് കമല്‍ഹാസനും യഥാര്‍ത്ഥ മഞ്ഞുമ്മല്‍ ബോയ്‌സിനെ കാണാന്‍ ആഗ്രഹം പ്രകടിപ്പിച്ചത്. ചെന്നൈയില്‍വച്ചായിരുന്നു കൂടിക്കാഴ്ച. ഒരു സ്വപ്‌നം യഥാര്‍ത്ഥ്യമായതുപോലെ തോന്നുന്നുവെന്നായിരുന്നു മഞ്ഞുമ്മല്‍ ബോയ്‌സ് പ്രതികരിച്ചത്.
നേരത്തെ മഞ്ഞുമ്മല്‍ ബോയ്‌സില്‍ അഭിനയിച്ച താരങ്ങളെയും സംവിധായകനെയും കമല്ഹാസന് നേരില്‍ കണ്ടിരുന്നു. കമല്‍ ഹാസനുവേണ്ടി സിനിമയുടെ പ്രത്യേക പ്രിമിയര്‍ ഷോയും സംഘടിപ്പിച്ചിരുന്നു. ഗുണ സംവിധായകന്‍ സന്താനഭാരതിയും പ്രിമിയര്‍ കാണാന്‍ എത്തിയിരുന്നു.
View this post on Instagram
ചിത്രം കേരളത്തില്‍ മാത്രമല്ല തമിഴ് നാട്ടിലും മറ്റു അന്യ സംസ്ഥാനങ്ങളിലും സൂപ്പര്‍ഹിറ്റായിരുന്നു. സിനിമ ഹിറ്റായതോടെ മഞ്ഞുമ്മല്‍ ബോയ്‌സ് താരങ്ങള്‍ക്കൊപ്പം, യഥാര്‍ത്ഥ മഞ്ഞുമ്മല്‍ ബോയ്‌സും സമൂഹമാധ്യമങ്ങളിലെ താരങ്ങളായി മാറി. വര്‍ഷങ്ങള്‍ക്കുശേഷം കൊടൈക്കനാലില്‍ എത്തിയ യഥാര്‍ത്ഥ മഞ്ഞുമ്മല്‍ ബോയ്‌സിനെ ആവേശത്തോടെയാണ് അവിടെയുള്ള നാട്ടുകാര്‍ സ്വീകരിച്ചത്.
ഈ വര്‍ഷത്തെ ബ്ലോക് ബസ്റ്റര്‍ ഹിറ്റായ മഞ്ഞുമ്മല്‍ ബോയ്‌സില്‍ കമല്‍ഹാസന്റെ ഗുണ സിനിമയിലെ കണ്‍മണി എന്ന ഗാനം ഉപയോഗിച്ചിട്ടുണ്ട്. കമല്ഹാസന് ചിത്രത്തില്‍ നന്ദിയും അര്‍പ്പിച്ചിട്ടുണ്ട്.
Recent Comments