ജെ.വി.ജെ. പ്രൊഡക്ഷന്‍സിന്റെ ബാനറില്‍ നവാഗതനായ വീര സംവിധാനം ചെയ്യുന്ന ഹാലിന്റെ ചിത്രീകരണം കോഴിക്കോട്ട് പൂര്‍ത്തിയായി. കോഴിക്കോടും മൈസൂറിലുമായി തൊണ്ണൂറു ദിവസം നീണ്ടു നിന്ന ചിത്രീകരണമാണ് പൂര്‍ത്തിയായത്. ഷെയ്ന്‍നിഗം നായകനാകുന്ന ചിത്രത്തില്‍ തെലുങ്ക് നടി സാക്ഷി വൈദ്യയാണ് നായിക. മമ്മൂട്ടി നായകനായി അഭിനയിച്ച ഏജന്റ് എന്ന ചിത്രത്തിലും സാക്ഷിയായിരുന്നു നായിക.
പ്രതികൂല കാലാവസ്ഥയും, നിരവധി പ്രതികൂല സാഹചര്യങ്ങളുമൊക്കെ ചിത്രീകരണത്തിന് വലിയ പ്രതിസന്ധികള്‍ക്കിടയാക്കി.പ്രതീക്ഷിച്ചതിലും വളരെയധികം ദിവസങ്ങള്‍ നീണ്ടുപോകാനും, ബഡ്ജറ്റിലും വലിയ വ്യത്യാസം ഉണ്ടായതായും ചിത്രീകരണത്തിനു സമാപനം കുറിച്ചു നടന്ന കൂട്ടായ്മയില്‍ സംവിധായകന്‍ വീര അനുസ്മരിച്ചു.
വലിയ മുതല്‍ മുടക്കില്‍ അവതരിപ്പിക്കുന്ന ഈ ചിത്രം, തികഞ്ഞ കാലിക പ്രാധാന്യമുള്ള വിഷയങ്ങളോടെയെത്തുന്ന പൂര്‍ണ്ണമായ ലൗ സ്റ്റോറിയാണ്. സംഗീത പ്രാധാന്യവും, ദൃശ്യ മനോഹരവുമായ മുഹൂര്‍ത്തങ്ങളിലൂടെ അവതരിപ്പിക്കുന്ന ഈ ചിത്രം സമീപകാല സിനിമയിലെ മികച്ച പ്രണയ ചിത്രമായിരിക്കും. ഏറെ വിവാദങ്ങള്‍ക്കു തിരി കൊളുത്താന്‍ പോരുന്നതായിരിക്കും ചിത്രത്തിന്റെ കാതലായ വിഷയം. ജോണി ആന്റണി സുരേഷ് കൃഷ്ണ, ജോയ് മാത്യൂ, മധുപാല്‍ കെ.യു. മനോജ്, നിഷാന്ത് സാഗര്‍, നിയാസ് ബക്കര്‍ ദിനേശ് പണിക്കര്‍, അബിന്‍ വിനോ, റിയാസ് നെടുമങ്ങാട്, വിനീത് വീപ് കുമാര്‍, മഞ്ജുഷ കോലോത്ത്, ശ്രീധന്യ എന്നിവരും ഈ ചിത്രത്തിലെ പ്രധാന താരങ്ങളാണ്.
നിഷാദ് കോയയുടേതാണ് തിരക്കഥ, സംഗീതം- വി. നന്ദഗോപാല്‍, ഛായാഗ്രഹണം- രവിചന്ദ്രന്‍, കലാസംവിധാനം- പ്രശാന്ത് മാധവ്, മേക്കപ്പ്- അമല്‍, കോസ്റ്റ്യും ഡിസൈന്‍- ധന്യാ ബാലകൃഷ്ണന്‍, ചീഫ് അസ്സോസ്സിയേറ്റ് ഡയറക്ടര്‍- മനീഷ് ഭാര്‍ഗവന്‍, അസ്സോസ്സിയേറ്റ് ഡയറക്ടേര്‍സ്- പ്രവീണ്‍ വിജയ്, പ്രകാശ് ആര്. നായര്‍, പ്രൊഡക്ഷന്‍ എക്‌സിക്കുട്ടീവ്- അബിന്‍ എടവനക്കാട്, പ്രൊഡക്ഷന്‍ കണ്‍ട്രോളര്‍- ബിജു പി.കെ., പി.ആര്.ഒ വാഴൂര്‍ ജോസ്.
Recent Comments