മോഹന്‍ലാല്‍ ആരാധകര്‍ ഏറ്റവും കൂടുതല്‍ കാത്തിരിക്കുന്ന ചിത്രം മലൈക്കോട്ടൈ വാലിബന്റെ ട്രെയിലര്‍ പുറത്തിറങ്ങി. കൊച്ചിയില്‍ നടന്ന താരസമ്പന്നമായ ചടങ്ങിലാണ് മലൈക്കോട്ടൈ വാലിബന്‍ ട്രെയിലര്‍ റിലീസ് ചെയ്തത്. ലിജോ ജോസ് പല്ലിശ്ശേരി സംവിധാനം ചെയ്യുന്ന ചിത്രം ജനുവരി 25നാണ് തിയറ്ററുകളിലെത്തുന്നത്.
വളരെ മികച്ച ഫ്രെയിമുകളാല്‍ സമ്പന്നമാണ് ട്രെയിലര്‍. ‘കണ്ണീരും ചോരയും വീണാണ് കടലുണ്ടാകുന്നത്… ആ കടലിന്റെ അടിയില്‍ നിന്ന് സൂര്യന്‍ ഉദിച്ചുവരും… സൂര്യന്റെ തീ ഈ കോട്ട ചാമ്പലാക്കും…’ എന്ന എലിവേഷന്‍ ഡയലോഗിന് ശേഷമാണ് ട്രെയിലറില്‍ വാലിബന്‍ അവതരിക്കുന്നത്. ഇതുവരെ കാണാത്ത ഒരു കളര്‍ പാലറ്റാണ് വിഷ്വലുകള്‍ മികച്ചതാക്കാന്‍ ലിജോ തിരഞ്ഞെടുത്തിരിക്കുന്നത്.
ചിത്രത്തിന്റെ മൂഡ് ട്രെയിലറില്‍ നിന്ന് വ്യക്തമാണ്. ലിജോ ജോസ് പല്ലിശ്ശേരിയുടെ ഒരു ദൃശ്യ വിരുന്നാണ് മോഹന്‍ലാല്‍ ആരാധകരെ കാത്തിരിക്കുന്നത്. പ്രശാന്ത് പിള്ളയുടെ സംഗീതത്തിന്റെ അകമ്പടി കൂടെയാകുമ്പോള്‍ ഇരട്ടി മധുരമാണ്. ട്രെയ്‌ലറിലൂടെ ചിത്രത്തിന്റെ ഹൈപ്പ് ഇനിയും ഉയരുമെന്ന് നിസ്സംശയം പറയാം.
മോഹന്‍ലാലിനൊപ്പം സൊണാലി കുല്‍ക്കര്‍ണി, മനോജ് മോസസ്, കഥ നന്ദി, ഡാനിഷ് സേഠ്, മണികണ്ഠന്‍ ആചാരി തുടങ്ങിയവരും പ്രധാന കഥാപാത്രങ്ങളെ അവതരിപ്പിക്കുന്നു.ഷിബു ബേബി ജോണ്‍, അച്ചു ബേബി ജോണ്‍ എന്നിവരുടെ നേതൃത്വത്തിലുള്ള ജോണ്‍ ആന്‍ഡ് മേരി ക്രിയേറ്റിവിസ്, കൊച്ചുമോന്റെ ഉടമസ്ഥതയിലുള്ള സെഞ്ച്വറി ഫിലിംസ്, അനൂപിന്റെ മാക്‌സ് ലാബ്, വിക്രം മെഹ്റ, സിദ്ധാര്‍ഥ് ആനന്ദ് കുമാര്‍ എന്നിവരുടെ ഉടമസ്ഥയിലുള്ള സരിഗമ ഇന്ത്യാ ലിമിറ്റഡ് എന്നിവരാണ് ചിത്രത്തിന്റെ നിര്‍മ്മാതാക്കള്‍. ഛായാഗ്രഹണം മധു നീലകണ്ഠനാണ് നിര്‍വഹിച്ചിരിക്കുന്നത്.
Recent Comments