നിലവില്‍ യൂട്യൂബിലെ ട്രെന്റിംഗ് ഗാനമാണ് ‘താനാരോ തന്നാരോ…’ ഇതിനകം ലക്ഷങ്ങളാണ് വീഡിയോ കണ്ടിരിക്കുന്നത്. ആയിരങ്ങളാണ് ഷെയര്‍ ചെയ്തിരിക്കുന്നത്. നവാഗതനായ മര്‍ഫി ദേവസി സംവിധാനം ചെയ്യുന്ന നല്ല നിലാവുള്ള രാത്രി എന്ന സിനിമയിലെ ഗാനരംഗമാണിത്. ഏറെ പ്രത്യേകതകള്‍ നിറഞ്ഞ ചിത്രം നിര്‍മ്മിക്കുന്നത് സാന്ദ്രാ തോമസാണ്. തന്റെ പുതിയ ചിത്രത്തിന്റെ വിശേഷങ്ങള്‍ സാന്ദ്രാതോമസ് കാന്‍ ചാനലുമായി പങ്കുവയ്ക്കുന്നു.
‘സാന്ദ്രാതോമസ് പ്രൊഡക്ഷന്‍സിന്റെ ബാനറില്‍ ഞാന്‍ നിര്‍മ്മിക്കുന്ന ആദ്യത്തെ ചിത്രമാണ് നല്ല നിലാവുള്ള രാത്രി. എന്റെ മുന്‍കാല ചിത്രങ്ങളെപോലെ ഇതും ഒരു പരീക്ഷണചിത്രമാണ്. ഇതില്‍ മെയില്‍ ആര്‍ട്ടിസ്റ്റുകള്‍ മാത്രമേയുള്ളൂ. അതുകൊണ്ട് ഇത് ഏതെങ്കിലും ഒരു ആര്‍ട്ടിസ്റ്റ് ബെയ്‌സ് ചിത്രമാകുന്നില്ല. ഇതിനെ ഒരു പ്രൊജക്ടെന്ന് വിശേഷിപ്പിക്കാനാണ് എനിക്കിഷ്ടം. മാസ്സ് ആക്ഷന്‍ ത്രില്ലറാണ് ചിത്രം. ചിത്രം സംവിധാനം ചെയ്തിരിക്കുന്നത് എന്റെ ക്ലാസ്‌മേറ്റ്‌സ് കൂടിയായ മര്‍ഫി ദേവസ്യയാണ്. ബാബുരാജ്, സായികുമാര്‍, ചെമ്പന്‍ വിനോദ്, ബിനു പപ്പു, രാജേഷ് തമ്പുരു, റോണി ഡേവിഡ്, ജിനു ജോസഫ്, സജിന്‍, നിഥിന്‍ ജോര്‍ജ്, ഗണപതി, കൈലാസ് എന്നിവരാണ് ചിത്രത്തിലെ കേന്ദ്രകഥാപാത്രങ്ങളെ അവതരിപ്പിക്കുന്നത്. ഇവരില്‍ സായിയേട്ടനും ചെമ്പനുമൊഴിച്ച് മറ്റുള്ളവരെല്ലാം കോളേജ് ഫ്രണ്ട്‌സാണ്. അവരുടെ ഗെറ്റ് ടുഗദറാണ് ഗാനരംഗത്തിന്റെ പശ്ചാത്തലം. കള്ളുകുടി സഭയാണ്. അതുകൊണ്ടാണ് ഇങ്ങനെയൊരു ഗാനം തന്നെ തെരഞ്ഞെടുത്തത്. ഇതിലെ വരികള്‍ എഴുതിയിരിക്കുന്നതും മര്‍ഫിയാണ്. കൈലാസാണ് ഈണം പകര്‍ന്നിരിക്കുന്നത്. ആ ഗാനരംഗത്തുള്ള ആര്‍ട്ടിസ്റ്റുകള്‍ തന്നെയാണ് (കൈലാസ് ഒഴിച്ച്) പാട്ട് പാടിയിരിക്കുന്നതും. പാട്ട് റിലീസായതിന് പിന്നാലെ അത് വൈറലായതില്‍ സന്തോഷമുണ്ട്. പോസ്റ്റ് പ്രൊഡക്ഷന്‍ വര്‍ക്കുകള്‍ പുരോഗമിക്കുന്ന ചിത്രം മെയ് 5 ന് തീയേറ്ററുകളില്‍ റിലീസിനെത്തും.’ സാന്ദ്രാ തോമസ് പറഞ്ഞു.
‘ഇടവേളയ്ക്കുശേഷം നിര്‍മ്മാണരംഗത്ത് ഞാന്‍ വീണ്ടും സജീവമാവുകയാണ്. ആന്റണി വര്‍ഗീസാണ് എന്റെ അടുത്ത ചിത്രത്തിലെ നായകന്‍. ചിത്രം ഏപ്രിലില്‍ തുടങ്ങും. അതിന്റെയും സംവിധായകര്‍ പുതുമുഖങ്ങളാണ്.’ സാന്ദ്ര പറഞ്ഞുനിര്‍ത്തി.
Recent Comments