ബിജുമേനോന്‍ -സുരാജ് വെഞ്ഞാറമൂട് കൂട്ടുകെട്ടില്‍ ഒരുങ്ങുന്ന ചിത്രം ‘നടന്ന സംഭവ’ത്തിന്റെ ടൈറ്റില്‍ ആന്‍ഡ് മോഷന്‍ പോസ്റ്റര്‍ പുറത്തിറങ്ങി. മഞ്ജുവാര്യര്‍, ടോവിനോ, സൗബിന്‍, റോഷന്‍ മാത്യു തുടങ്ങിയ താരങ്ങളുടെ ഫേസ്ബുക്ക് പേജിലൂടെയാണ് ടൈറ്റില്‍ പുറത്തിറക്കിയത്. ചിത്രത്തിലെ പ്രധാന താരങ്ങളെല്ലാം തന്നെ പോസ്റ്ററില്‍ കാണാവുന്നതാണ്. ‘ഒരു മെക്‌സിക്കന്‍ അപാരത’ എന്ന ഹിറ്റ് ചിത്രത്തിന് ശേഷം അനൂപ് കണ്ണന്‍ സ്റ്റോറീസ് നിര്‍മ്മിക്കുന്ന രണ്ടാമത്തെ ചിത്രമാണ് ‘നടന്ന സംഭവം’. അനൂപ് കണ്ണന്‍, രേണു എ എന്നിവരാണ് ചിത്രത്തിന്റെ നിര്‍മ്മാതാക്കള്‍.
മറഡോണ എന്ന ടോവിനോ ചിത്രത്തിനു ശേഷം വിഷ്ണുനാരായണ്‍ സംവിധാനം ചെയ്യുന്ന ചിത്രമാണിത്. ലാലു അലക്‌സ്, ജോണി ആന്റണി, ലിജോ മോള്‍ ജോസ്, ശ്രുതി രാമചന്ദ്രന്‍, സുധി കോപ്പ എന്നിവരും ചിത്രത്തില്‍ പ്രധാന വേഷങ്ങളില്‍ എത്തുന്നു. സ്വതസിദ്ധമായ അഭിനയ ശൈലിയിലൂടെ പ്രേക്ഷക മനം കവര്‍ന്ന താരങ്ങളാണ് ബിജുമേനോനും സുരാജ് വെഞ്ഞാറമൂടും. അതുകൊണ്ടുതന്നെ ഇരുവരും ഒന്നിക്കുന്ന ഒരു ചിത്രം എന്ന രീതിയില്‍ പ്രതീക്ഷകളും വാനോളം ഉയരും എന്നുറപ്പാണ്.
രാജേഷ് ഗോപിനാഥ് തിരക്കഥ എഴുതുന്ന ചിത്രത്തിന്റെ സംഗീതം ഒരുക്കുന്നത് അങ്കിത് മേനോന്‍. ‘ജയ ജയ ഹേ’ എന്ന സൂപ്പര്‍ ഹിറ്റ് സിനിമയ്ക്ക് ശേഷം അങ്കിത് മേനോന്‍ സംഗീതം ഒരുക്കുന്ന ചിത്രം കൂടിയാണിത്. ഛായാഗ്രഹണം മനേഷ് മാധവന്‍. എഡിറ്റര്‍ സൈജു ശ്രീധരന്‍, ടോബി ജോണ്‍. ആര്‍ട്ട് ഡയറക്ടര്‍ ഇന്ദുലാല്‍. പ്രൊഡക്ഷന്‍ കണ്‍ട്രോളര്‍ ഷെബീര്‍ മലവട്ടത്ത്. മേക്കപ്പ് ശ്രീജിത്ത് ഗുരുവായൂര്‍. കോസ്റ്റ്യൂം സുനില്‍ ജോര്‍ജ്, ചീഫ് അസോസിയേറ്റ് ഡയറക്ടേഴ്സ് ശ്രീജിത്ത് നായര്‍,സുനിത് സോമശേഖരന്‍ സ്റ്റില്‍സ് രാഹുല്‍ എം സത്യന്‍, ആക്ഷന്‍ പിസി സ്റ്റണ്ട്‌സ്, പിആര്‍ഒ മഞ്ജു ഗോപിനാഥ്. ഡിസൈന്‍സ് സീറോ ഉണ്ണി. തൃശ്ശൂരും എറണാകുളവും ആയിരുന്നു ചിത്രത്തിന്റെ പ്രധാന ലൊക്കേഷനുകള്‍.
Recent Comments