അന്നെന്റെ മടിയിലിരുന്ന് കളിച്ച പയ്യനാണ് ഇന്നത്തെ പാൻ ഇന്ത്യൻ സ്റ്റാർ

മലയാളത്തിന്റെ ആക്ഷൻ കിങ് ബാബു ആന്റണി കഴിഞ്ഞ ദിവസം സോഷ്യൽ മീഡിയയിൽ പോസ്റ്റ്‌ ചെയ്ത ചിത്രം വയറലാകുകയാണ്. ഫഹദ് ഫാസിലിനെ ചേർത്തു നിർത്തി പരസ്പരം കവിളിൽ മുത്തം നൽകുന്ന ബാബു ആന്റണിയെയും ഫഹദ് ഫാസിലിനെയും ചിത്രത്തിൽ കാണാം. സംവിധായകൻ ഫാസിലുമായി ഏറെ അടുപ്പമുള്ള വ്യക്തിയാണ് ബാബു ആന്റണി. 1986-ൽ ഫാസിൽ എഴുതി സംവിധാനം ചെയ്തു മമ്മൂട്ടി നായകനായി എത്തിയ പൂവിനു പുതിയ പൂന്തെന്നൽ എന്ന സിനിമ മുതൽ തുടങ്ങിയതാണ് ഫാസിലിനോടും കുടുംബത്തോടുമുള്ള ബാബു ആന്റണിയുടെ സ്നേഹവും കടപ്പാടും.1987-ൽ പൂവിനു പുതിയ പൂന്തെന്നൽ തമിഴിലേക്ക് റീമേക്ക് ചെയ്തപ്പോഴും സത്യരാജിനോടൊപ്പം വില്ലൻ വേഷം ചെയ്ത് ബാബു ആന്റണി ഉണ്ടായിരുന്നു. അതുവരെ ചെറിയ വേഷങ്ങൾ ചെയ്തിരുന്ന ബാബു ആന്റണിയുടെ കരിയറിലെ നാഴികക്കല്ലായി മാറുകയായിരുന്നു ആ ചിത്രം.

പൂവിനു പുതിയ പൂന്തെന്നൽ ചെയ്യുന്നതിനിടയിൽ ഫാസിൽ സാറിനോടൊപ്പം ഫഹദും ഷൂട്ടിംഗ് ലൊക്കേഷനിൽ വരുമായിരുന്നു. അന്ന് എൻ്റെ മടിയിൽ ഇരുന്നു കളിച്ചിരുന്ന ആ കൊച്ചുകുട്ടിയാണ് ഇന്നത്തെ പാൻ ഇന്ത്യൻ താരമായി മാറിയിരിക്കുന്നത്. അൽത്താഫ് സലിം സംവിധാനം ചെയ്ത‌ ഓടും കുതിര ചാടും കുതിരയുടെ ലൊക്കേഷനിൽ ഞങ്ങൾ,” എന്ന കുറിപ്പോടെയാണ് ബാബു ആന്റണി ചിത്രം സോഷ്യൽ മീഡിയയിൽ പങ്കുവച്ചത്. ഫഹദ് ഫാസിലിനെ നായകനാക്കി അൽത്താഫ് സലിം തിരക്കഥയെഴുതി സംവിധാനം ചെയ്യുന്ന ചിത്രമാണ് “ഓടും കുതിര ചാടും കുതിര’. കല്യാണി പ്രിയദർശൻ, രേവതി പിള്ള, ധ്യാൻ ശ്രീനിവാസൻ, വിനയ് ഫോർട്ട്, ലാൽ, രൺജി പണിക്കർ, റാഫി, ജോണി ആന്റണി, സുരേഷ് കൃഷ്ണ, നന്ദു, അനുരാജ്, ഇടവേള ബാബു, ബാബു ആന്റണി, വിനീത് ചാക്യാർ, സാഫ് ബോയ്, ലക്ഷ്മ്‌മി ഗോപാലസ്വാമി, ആതിര നിരഞ്ജന തുടങ്ങിയവരും ചിത്രത്തിലുണ്ട്.

ആഷിഖ് ഉസ്മാൻ പ്രൊഡക്ഷൻസിന്റെ ബാനറിൽ ആഷിഖ് ഉസ്മാനാണ് ചിത്രം നിർമ്മിക്കുന്നത്. ഛായാഗ്രഹണം ജിന്റോ ജോർജ്ജ്, സംഗീതം ജെസ്റ്റിൻ വർഗ്ഗീസ്, എഡിറ്റിംഗ് അഭിനവ് സുന്ദർ നായിക് എന്നിവർ നിർവ്വഹിക്കുന്നു.