ടൊവിനോ തോമസ് നായകനാകുന്ന അന്വേഷിപ്പിന്‍ കണ്ടെത്തും എന്ന ചിത്രത്തിന്റെ ടീസര്‍ പുറത്തിറത്തിറങ്ങി. ജിനു വി എബ്രാഹാമിന്റെ രചനയില്‍ ഡാര്‍വിന്‍ കുര്യാക്കോസാണ് ചിത്രം സംവിധാനം ചെയ്തിരിക്കുന്നത്. ഫെബ്രുവരി 9നാണ് ചിത്രം തിയറ്ററുകളിലേക്ക് എത്തുന്നത്
മാസ്സ് ഗെറ്റപ്പുകളൊന്നുമില്ലാതെ സാധാരണക്കാരനായ ഒരു പോലീസുകാരന്റെ ലുക്കിലാണ് ടൊവിനോയെ ടീസറില്‍ കാണാന്‍ സാധിക്കുന്നത്. നിഗൂഢത നിറഞ്ഞ കഥാപശ്ചാത്തലവും ടീസറില്‍ നിന്ന് വ്യക്തമാണ്. സിദ്ദിഖ്, ഹരിശ്രീ അശോകന്‍, പ്രേം പ്രകാശ്, പ്രമോദ് വെളിയനാട്, വിനീത് തട്ടില്‍, രാഹുല്‍ രാജഗോപാല്‍, ഇന്ദ്രന്‍സ്, സിദ്ദിഖ്, ഷമ്മി തിലകന്‍, കോട്ടയം നസീര്‍, മധുപാല്‍, അസീസ് നെടുമങ്ങാട് തുടങ്ങിയവരും ചിത്രത്തില്‍ വേഷമിടുന്നു.
കേസ് അന്വേഷണത്തിനായി എത്തുന്ന ചെറുവള്ളി പൊലീസ് സ്റ്റേഷന്‍ എസ് ഐ ആനന്ദ് നാരായണന്റെയും നാലുപേരടങ്ങുന്ന സംഘത്തിന്റെയും കഥയാണ് ചിത്രം പറയുന്നത്. പതിവ് ഇന്‍വെസ്റ്റിഗേഷന്‍ ഫോര്‍മുലയില്‍ നിന്ന് മാറി അന്വേഷകരുടെ കഥ സംസാരിക്കുന്നതിനാണ് ചിത്രം പ്രാധാന്യം കൊടുത്തിരിക്കുന്നത്.
കല്‍ക്കി, എസ്ര എന്നീ ചിത്രങ്ങള്‍ക്ക് ശേഷം ടൊവിനോ പോലീസ് വേഷത്തിലെത്തുന്നത് ഈ ചിത്രത്തിലാണ്. ടൊവിനോയുടെ പിതാവ് അഡ്വ. ഇല്ലിക്കല്‍ തോമസും ചിത്രത്തില്‍ സുപ്രധാനമായൊരു വേഷം കൈകാര്യം ചെയ്യുന്നുണ്ട്. സംഗീത സംവിധായകന്‍ സന്തോഷ് നാരായണന്‍ സംഗീതവും പശ്ചാത്തല സംഗീതവും നിര്‍വഹിക്കുന്ന ആദ്യ മലയാള സിനിമയാണ് അന്വേഷിപ്പിന്‍ കണ്ടെത്തും. തീയറ്റര്‍ ഓഫ് ഡ്രീംസിന്റെ ബാനറില്‍ ഡോള്‍വിന്‍ കുര്യാക്കോസ്, ജിനു വി എബ്രാഹാം, എന്നിവര്‍ക്കൊപ്പം സരിഗമയുടെ ബാനറില്‍ വിക്രം മെഹ്‌റയും സിദ്ധാര്‍ഥ് ആനന്ദ് കുമാറും ചേര്‍ന്നാണ് ചിത്രം നിര്‍മിച്ചിരിക്കുന്നത്.
Recent Comments