മലയാളികള്‍ കാത്തിരിക്കുന്ന ബേസില്‍ ജോസഫ് ചിത്രമാണ് മിന്നല്‍ മുരളി. ചിത്രത്തിന്റെ ഡിജിറ്റല്‍ പ്രീമിയര്‍ അവകാശം നെറ്റ്ഫ്ളിക്സ് സ്വന്തമാക്കിയിരുന്നു. ടൊവിനോ തോമസ് സൂപ്പര്‍ ഹീറോയായി വേഷമിടുന്ന ചിത്രം മലയാളത്തിന് പുറമെ തമിഴ്, തെലുങ്ക്, കന്നഡ, ഹിന്ദി തുടങ്ങിയ ഭാഷകളിലും റിലീസിനെത്തുന്നുണ്ട്.
സിനിമ തിയറ്ററുകളിലൂടെ തന്നെ റിലീസ് ചെയ്യും എന്നാണ് ആദ്യം അറിയിച്ചത്. എന്നാല്‍, നിലവിലെ സാഹചര്യത്തില്‍ ചിത്രം നേരിട്ട് ഒടിടി റിലീസിനൊരുങ്ങുന്ന വിവരം പുറത്ത് വിട്ടിരിക്കുകയാണ് അണിയറക്കാര്‍. ടീസറിലൂടെയാണ് നെറ്റ്ഫ്‌ലിക്‌സ് റിലീസിന്റെ കാര്യം അറിയിച്ചത്.
കഴിഞ്ഞ ദിവസം നെറ്റ്ഫ്ളിക്സ് ഇന്ത്യയുടെ പുതിയ ട്വീറ്റ് വന്നിരുന്നു ‘ഇന്നത്തെ ദിവസം എളുപ്പത്തില്‍ പോകുമെന്ന് ഞങ്ങള്‍ പ്രതീക്ഷിക്കുന്നു. കാരണം നാളെ ഇതിലും എളുപ്പത്തില്‍ കടന്നുപോകും’ എന്ന് കുറിച്ചുകൊണ്ട് മിന്നലിനെ സൂചിപ്പിക്കുന്ന ഇമോജിയും നെറ്റ്ഫ്ളിക്സ് ട്വീറ്റില്‍ ചേര്‍ത്തിരുന്നു. ട്വീറ്റിന് താഴെ മിന്നല്‍ മുരളിയുടെ പോസ്റ്ററുകള്‍ പങ്കുവച്ചുകൊണ്ട് ആരാധകരും എത്തിയിരുന്നു. ഇതിന് പിന്നാലെയാണ് ഇന്ന് സിനിമയുടെ റിലീസ് പ്രഖ്യാപിച്ചത്.
അജു വര്‍ഗീസ്, ബൈജു, ഹരിശ്രീ അശോകന്‍, ഫെമിന ജോര്‍ജ്, ജിഗതര്‍തണ്ട ഫെയിം ഗുരു സോമസുന്ദരം എന്നിവരാണ് മറ്റ് പ്രധാന താരങ്ങള്‍. അരുണ്‍ അനിരുദ്ധന്‍, ജസ്റ്റിന്‍ മാത്യു എന്നിവര്‍ ചേര്‍ന്നാണ് ചിത്രത്തിന്റെ രചന നിര്‍വഹിച്ചിരിക്കുന്നത്. വീക്കെന്‍ഡ് ബ്ലോക്ക്ബസ്റ്റേഴ്‌സിന്റെ ബാനറില്‍ സോഫിയ പോള്‍ ആണ് മിന്നല്‍ മുരളി നിര്‍മിക്കുന്നത്.
ഇത് ഞങ്ങളുടെ സ്വപ്‌നസിനിമ- സംവിധായകന്‍ ബേസില്‍ ജോസഫ്.
‘കാഴ്ചക്കാര്‍ക്ക് വൈകാരിക തലത്തില്‍ സംവേദിക്കാനും ബന്ധപ്പെടാനും കഴിയുന്ന ഒരു സൂപ്പര്‍ ഹീറോയെ സൃഷ്ടിക്കാനാണ് ഞങ്ങള്‍ ശ്രമിച്ചത്. ഒരു സൂപ്പര്‍ ഹീറോ സിനിമയുടെ പ്രധാന ഘടകങ്ങള്‍ ആക്ഷനും ചടുലതയും ആണെങ്കിലും ശക്തമായൊരു ആഖ്യാനത്തിലൂന്നി കഥ പറയുവാനായിരുന്നു ഞങ്ങള്‍ കൂടുതല്‍ ശ്രമിച്ചത്. ചിത്രം വളരെ ആവേശകരമായ ഒന്നായിരിക്കുമെന്ന് പ്രതീക്ഷിക്കുന്നു. റിലീസിനായി എല്ലാവരെയും പോലെ ഞാനും കാത്തിരിക്കുകയാണ്. ഇത് ഞങ്ങള്‍ മുഴുവന്‍ ടീമിന്റെയും സ്വപ്നസിനിമയാണ്. ചിത്രം നെറ്റ്ഫ്ളിക്സ് പോലെയുള്ള ഒരു ലോകോത്തര പ്ലാറ്റ്‌ഫോമില്‍ റിലീസ് ചെയ്യുന്നതില്‍ ഒരു പാട് സന്തോഷമുണ്ട്.’
Recent Comments