ടൊവിനോ തോമസിന്റെ പിറന്നാള്‍ ദിനത്തില്‍ മറ്റൊരുചിത്രംകൂടി അനൗണ്‍സ് ചെയ്യപ്പെട്ടിരിക്കുന്നു- നടികര്‍ തിലകം. ലാല്‍ ജൂനിയറാണ് ചിത്രം സംവിധാനം ചെയ്യുന്നത്. ഇരുവരും ആദ്യമായി ഒരുമിക്കുന്ന ചിത്രം കൂടിയാണിത്.
സൗബിന്‍ ഷാഹിറും ചിത്രത്തിലെ മറ്റൊരു കേന്ദ്രകഥാപാത്രത്തെ അവതരിപ്പിക്കുന്നു. വന്‍ താരനിരയാണ് ഈ ബിഗ് ബജറ്റ് ചിത്രത്തിന്റെ ഭാഗമാകാന്‍ ഒരുങ്ങുന്നത്.
നടികര്‍ തിലകത്തിന്റെ ഷൂട്ടിംഗ് ജൂണില്‍ ആരംഭിക്കും. നേരത്തേ ഏപ്രിലില്‍ തുടങ്ങാനിരുന്ന ചിത്രമായിരുന്നു. ടൊവിനോ തോമസ് നായകനാകുന്ന അജയന്റെ രണ്ടാം മോഷണത്തിന്റെ ഷൂട്ടിംഗ് നീണ്ടതും സൗബിന്റെ ഡേറ്റ് ക്ലാഷുമാണ് നടികര്‍ തിലകത്തിന്റെ ചിത്രീകരണം നീളാന്‍ ഇടയാക്കിയത്. കേരളത്തിന് പുറമെ കൊടൈക്കനാല്‍, മൂന്നാര്‍, ഹൈദരാബാദ്, കാശ്മീര്‍, ദുബായ്, തായ്‌ലന്റ് എന്നിവിടങ്ങളിലായിട്ടാണ് ചിത്രീകരണം.
സുവിന്‍ എസ്. സോമശേഖരനാണ് നടികര്‍ തിലകത്തിനുവേണ്ടി കഥയും തിരക്കഥയും സംഭാഷണവും എഴുതുന്നത്. സ്റ്റാര്‍ എന്ന ചിത്രത്തിനുശേഷം സുവിന്‍ തിരക്കഥ ഒരുക്കുന്ന ചിത്രംകൂടിയാണിത്.
നടികര്‍ തിലകം എന്ന വിശേഷണത്തിന് അര്‍ഹനായ ഒരേയൊരു നടനേ ഇന്ത്യയിലുള്ളൂ. അത് ശിവാജി ഗണേശനാണ്. തീര്‍ച്ചയായും ഈ സിനിമയും ഒരു താരത്തിന്റെ കഥ തന്നെയാണ് പറയുന്നത്.
മൈത്രി മൂവീ മേക്കേഴ്‌സും ഗോഡ് സ്പീഡും ചേര്‍ന്നാണ് ഈ ബ്രഹ്‌മാണ്ഡ ചിത്രം നിര്‍മ്മിക്കുന്നത്. നവീന്‍, രവിശങ്കര്‍, അലന്‍ ആന്റണി, അനൂപ് വേണുഗോപാല്‍ എന്നിവരാണ് നിര്‍മ്മാതാക്കള്‍. ആല്‍ബി ഛായാഗ്രഹണം ഒരുക്കുന്ന ചിത്രത്തിന്റെ പ്രൊഡക്ഷന്‍ ഡിസൈനര്‍ പ്രശാന്ത് മാധവും പ്രൊഡക്ഷന്‍ കണ്‍ട്രോളര്‍ മനോജ് കാരന്തൂരുമാണ്. രതീഷ് രാജാണ് എഡിറ്റര്‍.
Recent Comments