ട്രാന്‍സ് വുമണ്‍ നേഹ നായികയായ അന്തരം ബാംഗ്ലൂര്‍ ക്വീര്‍ ഫിലിം ഫെസ്റ്റിവലില്‍ പ്രദര്‍ശിപ്പിക്കും. കാഷിഷ് മുംബൈ ഇന്റര്‍നാഷണല്‍ ഫിലിം ഫെസ്റ്റിവല്‍, ജയ്പൂര്‍ ഇന്റര്‍നാഷണല്‍ ഫിലിം ഫെസ്റ്റിവല്‍ എന്നീ രാജ്യാന്തര ഫിലിം ഫെസ്റ്റിവലുകളിലും അന്തരം പ്രദര്‍ശിപ്പിച്ചിരുന്നു. സ്ത്രീ – ട്രാന്‍സ്‌ജെന്‍ഡര്‍ വിഭാഗത്തില്‍ ആദ്യമായി കേരള സര്‍ക്കാരിന്റെ സംസ്ഥാന ചലച്ചിത്ര പുരസ്‌കാരം നേടിയ ചിത്രമാണ് അന്തരം.
പി. അഭിജിത്താണ് സംവിധായകന്‍. ഫോട്ടോ ജേര്‍ണലിസ്റ്റ് കൂടിയായ അഭിജിത്തിന്റെ ആദ്യ സംവിധാനസംരംഭമാണ്. കോള്‍ഡ് കേസ്, എസ് ദുര്‍ഗ്ഗ, ലില്ലി എന്നീ ചിത്രങ്ങളിലൂടെ ശ്രദ്ധേയനായ കണ്ണന്‍ നായരാണ് ചിത്രത്തിലെ നായകന്‍. ‘രക്ഷാധികാരി ബൈജു’ എന്ന ചിത്രത്തിലെ അഭിനയത്തിന് മികച്ച ബാലതാരത്തിനുള്ള സംസ്ഥാന അവാര്‍ഡ് ലഭിച്ച നക്ഷത്ര മനോജ് മറ്റൊരു പ്രധാന കഥാപാത്രത്തെ അവതരിപ്പിക്കുന്നു. എഴുത്തുകാരിയും അഭിനേത്രിയും പ്രമുഖ ട്രാന്‍സ് ആക്റ്റിവിസ്റ്റുമായ എ. രേവതി അതിഥി താരമായി എത്തുന്നു.
ട്രാന്‍സ് വുമണിന്റെ ജീവിതമാണ് ചിത്രം പറയുന്നത്. ഒപ്പം ട്രാന്‍സ്ജന്‍ഡര്‍ സമൂഹം നേരിടുന്ന വെല്ലുവിളികളും ചിത്രം ചര്‍ച്ച ചെയ്യുന്നു. ഗ്രൂപ്പ് ഫൈവ് എന്റര്‍ടെയിന്‍മെന്റ്‌സിന്റെ ബാനറില്‍ ജോജോ ജോണ്‍ ജോസഫ്, പോള്‍ കൊള്ളന്നൂര്‍, ജോമിന്‍ വി ജിയോ, രേണുക അയ്യപ്പന്‍, എ ശോഭില എന്നിവര്‍ ചേര്‍ന്നാണ് ചിത്രം നിര്‍മ്മിക്കുന്നത്. പിആര്‍ഒ പി.ആര്‍. സുമേരന്‍.
Recent Comments