എമ്പുരാന്റെ തിരക്കഥ പൂര്‍ത്തിയായ വിവരം കുറച്ച് ദിവസങ്ങള്‍ക്ക് മുമ്പാണ് മുരളിഗോപി തന്റെ സോഷ്യല്‍മീഡിയ പേജ് വഴി പുറത്തുവിട്ടത്. ഈ വര്‍ഷാവസാനം ചിത്രത്തിന്റെ ഷൂട്ടിംഗ് തുടങ്ങാനിരിക്കെ പുതിയൊരു സിനിമയുടെ അനൗണ്‍സ്‌മെന്റ് നടത്തിയിരിക്കുകയാണ് എമ്പുരാന്റെ സംവിധായകന്‍ കൂടിയായ പൃഥ്വിരാജ്.
ടൈസണ്‍ എന്നാണ് ചിത്രത്തിന്റെ പേര്. മുരളിഗോപിയാണ് കഥയും തിരക്കഥയും സംഭാഷണവും എഴുതുന്നത്. കെ.ജി.എഫിന്റെ നിര്‍മ്മാതാവായ വിജയ് കിരഗണ്ടൂരാണ് ഈ ബിഗ് ബജറ്റ് ചിത്രവും അണിയിച്ചൊരുക്കുന്നത്. ഇതു സംബന്ധിച്ച് പൃഥ്വിയും മുരളി ഗോപിയുമായി നിര്‍മ്മാതാവ് വിജയ് കിരഗണ്ടൂര്‍ അന്തിമ കരാറില്‍ ഒപ്പുവച്ചിട്ടുണ്ട്. മലയാളത്തിന് പുറമെ ഹിന്ദി, തമിഴ്, തെലുങ്ക്, കന്നഡ എന്നീ ഭാഷകളിലും ടൈസണ്‍ നിര്‍മ്മിക്കുന്നു. എമ്പുരാന് പൂര്‍ത്തിയാക്കിയതിന് ശേഷമാണ് ടൈസണിന്റെ ഷൂട്ടിംഗ് പ്ലാന്‍ ചെയ്തിരിക്കുന്നത്. 2023 ല്‍ ഷൂട്ടിംഗ് ആരംഭിക്കും. 2024 ല്‍ ലോകമെമ്പാടുമുള്ള തീയേറ്ററുകളില്‍ ചിത്രം പ്രദര്‍ശനത്തിനെത്തും.
ടൈസണിന്റെ കൂടുതല്‍ വിവരങ്ങള്‍ അറിയാന്‍ മുരളി ഗോപിയെയും വിളിച്ചിരുന്നു.
‘വളരെ മുമ്പേ എന്റെ മനസ്സിലുള്ള സബ്ജക്ടാണ്. എനിക്ക് ഏറെ പ്രിയപ്പെട്ടവയിലൊന്നും. അതിപ്പോഴാണ് യാഥാര്‍ത്ഥ്യമായത്. ടൈസണില്‍ പൃഥ്വിരാജും അഭിനയിക്കുന്നുണ്ട്. ഞാന്‍ എഴുതുന്ന തിരക്കഥകളില്‍നിന്ന് ഒരു നടന്‍ എന്ന നിലയില്‍ ഒഴിവായി നില്‍ക്കുന്നതാണ് എന്റെ ശീലം. വരും ദിവസങ്ങളില്‍ ഇത് സംബന്ധിച്ച് കൂടുതല്‍ വെളിപ്പെടുത്തലുകളുണ്ടാകും.’ മുരളിഗോപി കാന്‍ ചാനലിനോട് പറഞ്ഞു.
Recent Comments