ജെ ആന്‍ഡ് എ പ്രൈം പ്രൊഡക്ഷന്‍സിന്റെ ബാനറില്‍ സ്റ്റീഫന്‍ എം ജോസഫ് തിരക്കഥയും സംവിധാനവും ചെയ്യുന്ന തമിഴ് ചിത്രമാണ് ‘യോസി’. പ്രശസ്ത നടി ഉര്‍വശിയുടെ സഹോദരപുത്രനും പുതുമുഖമായ അഭയ് ശങ്കറാണ് നായകന്‍. തമിഴിലും മലയാളത്തിലുമായി നായകനായിട്ടാണ് അരങ്ങേറ്റം. ത്രില്ലര്‍ എന്റര്‍ടൈന്‍മെന്റാണ് ചിത്രം. മാര്‍ച്ച് 31 ന് തമിഴ് നാട്ടിലും, കര്‍ണാടകത്തിലും, കേരളത്തിലുമായി റിലീസിനെത്തും. ജെ ആന്‍ഡ് എ പ്രൈം പ്രൊഡക്ഷന്‍സും എവിഐ മൂവി മേക്കര്‍സും ചേര്‍ന്നാണ് യോസി പ്രേക്ഷകര്‍ക്ക് മുന്നിലെത്തുന്നത്. 72 ഫിലിം കമ്പനിയാണ് ചിത്രത്തിന്റെ വൈഡ് റിലീസ് വിതരണം ഏറ്റെടുത്തിരിക്കുന്നത്. ഇടുക്കി, നാഗര്‍കോവില്‍, ചെന്നൈ എന്നിവിടങ്ങളിലായിട്ടായിരുന്നു ചിത്രീകരണം.
നീറ്റ് മെഡിക്കല്‍ പരീക്ഷയെ ഭയന്ന് വീട്ടുകാരെല്ലാം കൊടുക്കുന്ന മനോവിഷമം താങ്ങാന്‍ വയ്യാതെ ആത്മഹത്യ ചെയ്യാന്‍ ശ്രമിക്കുന്ന ഒരു മെഡിക്കല്‍ വിദ്യാര്‍ഥിയുടെ ലൈഫ് ട്രാവല്‍ കാണിക്കുന്ന കഥാപാത്രത്തെയാണ് അഭയ് ശങ്കര്‍ ചെയ്തിരിക്കുന്നത്. എന്നാല്‍ അതില്‍ നിന്ന് രക്ഷപ്പെട്ട് കൊടുംകാട്ടില്‍ പെട്ടു പോവുന്ന ആ വ്യക്തിക്ക് പിന്നെ എന്ത് സംഭവിച്ചു എന്നുള്ളതാണ് ഈ ചിത്രം പറയുന്നത്. ‘വളരെ അപകടമുള്ള സീനുകളാണ് തുടക്കം മുതല്‍ അവസാനം വരെയും. അതും കൊടുംകാട്ടിനുള്ളില്‍ പാതിരാത്രിയിലുമൊക്കെയായിരുന്നു ഇതിന്റെ ചിത്രീകരണമെന്നും വളരെ പ്രയാസമേറിയതും എന്നാല്‍ വളരെ സന്തോഷത്തോടെ ചെയ്യാന്‍ പറ്റിയ ഒരു സിനിമയാണെന്നും’ അഭയ് ശങ്കര്‍ പറയുന്നു.
മുംബൈയില്‍ കായികതാരവും പല കമേഴ്‌സ്യല്‍ പരസ്യചിത്രങ്ങളും ചെയ്തിട്ടുള്ള മലയാളി പുതുമുഖമായ രേവതി വെങ്കട്ട് ആണ് നായിക. ഉര്‍വശി, കലാരഞ്ജിനി എന്നിവരും ഈ ചിത്രത്തില്‍ അഭിനയിച്ചിരിക്കുന്നു. പതിനഞ്ചു വര്‍ഷത്തെ ഇടവേളയ്ക്കുശേഷം ഇരുവരും ഒന്നിച്ചഭിനയിക്കുന്നു എന്ന പ്രത്യേകതയും ഈ ചിത്രത്തിനുണ്ട്. ഇവരെ കൂടാതെ അര്‍ച്ചന ഗൗതം, സാം ജീവന്‍, അച്ചു മാളവിക, ശരവണന്‍, മയൂരന്‍, കൃഷ്ണ, ബാര്‍ഗവ് സൂര്യ എന്നിവരും ഈ സിനിമയില്‍ വേഷങ്ങള്‍ ചെയ്തിട്ടുണ്ട്.
കെ കുമാര്‍, റോബിന്‍ രാജശേഖര്‍, വി അരുണ്‍, എ എസ് വിജയ് എന്നിവര്‍ ചേര്‍ന്നാണ് ഗാനങ്ങള്‍ക്ക് സംഗീതം ഒരുക്കിയിരിക്കുന്നത്. ഛായാഗ്രഹണം ആറുമുഖം. സംഘട്ടനം ജാക്കി ജോണ്‍സണ്‍. പെരിയസാമിയും ആനന്ദ് കൃഷ്ണയുമാണ് സെക്കന്റ് യൂണിറ്റ് ക്യാമറ കൈകാര്യം ചെയ്തിരിക്കുന്നത്. കൊറിയോഗ്രാഫര്‍ ജയ്. വസ്ത്രാലങ്കാരം ഡയാന വിജയകുമാരി. മേക്കപ്പ് കലൈവാണി. സ്റ്റില്‍സ് ഗിരീഷ് അമ്പാടി. പിആര്‍ഒ എം.കെ. ഷെജിന്‍.
Recent Comments