യുവ നടിയെ പീഡിപ്പിച്ച കേസില്‍ നടന്‍ വിജയ് ബാബുവിനെ എറണാകുളം സൗത്ത് പോലീസ് അറസ്റ്റ് ചെയ്തു. ചോദ്യം ചെയ്യലുമായി ബന്ധപ്പെട്ട് വിജയ് ബാബു സൗത്ത് പോലീസ് സ്റ്റേഷനില്‍ എത്തിയപ്പോഴായിരുന്നു അറസ്റ്റ് രേഖപ്പെടുത്തിയത്. കോടതിയുടെ നിര്‍ദേശപ്രകാരം ഒരു ഇടവേളയ്ക്ക് ശേഷമാണ് വിജയ് ബാബുവിന്റ ചോദ്യം ചെയ്യല്‍ ആരംഭിച്ചത്.
വിദേശത്ത് നിന്ന് ജൂണ്‍ 1ന് മടങ്ങിയെത്തിയ വിജയ് ബാബുവിനെ ചോദ്യം ചെയ്‌തെങ്കിലും അറസ്റ്റ് രേഖപ്പെടുത്തിയിരുന്നില്ല. മുന്‍കൂര്‍ ജാമ്യത്തില്‍ തീര്‍പ്പു വരാത്തത് മൂലമാണ് വിജയ് ബാബുവിനെ അന്ന് അറസ്റ്റ് ചെയ്യാതിരുന്നത്. നിലവില്‍ മുന്‍കൂര്‍ ജാമ്യത്തില്‍ തുടരുന്ന വിജയ് ബാബുവിനെ കോടതിയുടെ നിര്‍ദ്ദേശപ്രകാരമാണ് അറസ്റ്റ് ചെയ്തിരിക്കുന്നത്. അതുകൊണ്ടുതന്നെ സ്റ്റേഷന്‍ ജാമ്യം ലഭിക്കും.
കേസുമായി ബന്ധപ്പെട്ട് തെളിവെടുപ്പ് ഇന്ന് തന്നെ തുടങ്ങുമെന്നാണ് സൗത്ത് പോലീസ് അറിയിച്ചിരിക്കുന്നത്. പീഡിപ്പിക്കപ്പെട്ട നടിയുടെ പരാതി പ്രകാരം വിജയ് ബാബു വിവിധ സ്ഥലങ്ങളില്‍ കൊണ്ട് പോയി നടിയെ പീഡിപ്പിക്കുകയും ദേഹോപദ്രവം ഏല്‍പ്പിക്കുകയും ചെയ്തു എന്ന് രേഖപ്പെടുത്തിയിട്ടുണ്ട്. ഈ സ്ഥലങ്ങളിലെല്ലാം വിജയ് ബാബുവിനെയും കൊണ്ടുപോയി തെളിവെടുക്കാന്‍ ആണ് പോലീസ് തീരുമാനിച്ചിരിക്കുന്നത്.
Recent Comments