തമിഴകത്ത് രജനിക്ക് ശേഷം ഏറെ ആരാധകരുള്ള താരമാണ് വിജയ്. അതുകൊണ്ട് തന്നെ അദ്ദേഹത്തെ സംബന്ധിച്ചുള്ളതെന്തും വാര്‍ത്താപ്രാധാന്യം നേടിയെടുക്കാറുണ്ട്. പതിവ് തെറ്റിക്കാതെ ഇക്കുറിയും തന്റെ പുതിയ ചിത്രത്തിന്റെ ടീസര്‍ ഏറെ പുതുമകളോടെയാണ് താരം പുറത്തുവിട്ടത്. നിര്‍മ്മാതാവായ കലൈനിഥി മാരനെ സണ്‍ പിക്‌ച്ചേഴ്‌സിന്റെ ഓഫീസില്‍വച്ച് കാണുന്നതും ചിത്രത്തിന്റെ സംവിധായകനായ നെല്‍സനെ കണ്ടുമുട്ടുന്നതും തുടര്‍ന്ന് മാസ്സ് ബിജിഎമ്മോട് കൂടി ‘ദളപതി 65’ ടീസര്‍ പുറത്ത് വിട്ടത് ആരാധര്‍ ഏറ്റെടുത്ത് വൈറലാക്കി. നയന്‍താര നായികയായ കോലമാവ് കോകില എന്ന സിനിമയിലൂടെ ശ്രദ്ധിക്കപ്പെട്ട സംവിധായകന്‍ നെല്‍സനാണ് ചിത്രത്തിന്റെ സംവിധായകന്‍.
ടീസര്‍ റിലീസായികഴിഞ്ഞപ്പോള്‍ ഈ ടീസറും കുറച്ചുനാള്‍മുമ്പ് പുറത്തുവന്ന കമല്‍ ഹാസ്സന്റെ വിക്രം ടീസറുമായി ഏറെ സാമ്യമുണ്ടെന്ന് പലരും ചൂണ്ടിക്കാണിച്ചത് വിവാദത്തിലായി. രണ്ട് ചലച്ചിത്രങ്ങളുടെയും ടീസറിന്റെ സാമ്യത വിജയ് ആരാധകരെ കടുത്ത നിരാശയിലാഴ്ത്തി. എന്നാല്‍ രണ്ട് ടീസറും തമ്മില്‍ യാതൊരു സാമ്യവുമില്ല എന്ന് ചിത്രത്തിന്റെ അണിയറപ്രവര്‍ത്തകരില്‍ പലരും ട്വീറ്റ് ചെയ്യുന്നുമുണ്ട്.
ലോകേഷ് കനകരാജ് സംവിധാനം ചെയ്യുന്ന വിക്രമിന്റെയും വിജയ് ചിത്രത്തിന്റെ ടീസറും തമ്മില്‍ സാമ്യ ഉണ്ടെന്ന് പറയുന്നത് ടീസറില്‍ കാണിക്കുന്ന വെടിയുണ്ടകളുടെയും തോക്കുകളുടെയും പശ്ചാത്തലം ഒന്നായതുകൊണ്ടാണ്. യാദൃച്ഛികമെന്ന് പറയട്ടെ രണ്ട് സിനിമകളുടെയും സംഗീതം നിര്‍വ്വഹിച്ചിരിക്കുന്നത് അനിരുദ്ധാണുതാനും.
Recent Comments