വിശാല്‍ നായകനാകുന്ന ‘ലാത്തി’യുടെ ടീസര്‍ കഴിഞ്ഞ ദിവസം പുറത്തുവിട്ടു. ചെന്നൈയില്‍ നടന്ന ചടങ്ങില്‍വെച്ച് ഉദയനിധി സ്റ്റാലിന്‍, എസ്.ജെ. സൂര്യ എന്നിവര്‍ ചേര്‍ന്നാണ് ടീസര്‍ റിലീസ് ചെയ്തത്. അഞ്ചു ഭാഷകളിലായാണ് ടീസര്‍ പുറത്തിറങ്ങിയത്.
സ്റ്റണ്ട് മാസ്റ്റര്‍ പീറ്റര്‍ ഹെയ്ന്‍ ഒരുക്കിയ സംഘട്ടന രംഗങ്ങളും പഞ്ച് ഡയലോഗുകളും കോര്‍ത്തിണക്കിയതാണ് ടീസര്‍. ടീസര്‍ ഇറങ്ങിയതിന് പിന്നാലെ അതിന് വന്‍ സ്വീകരണമാണ് ലഭിച്ചിരിക്കുന്നത്.
റാണാ പ്രൊഡക്ഷന്റെ ബാനറില്‍ രമണയും നന്ദയും ചേര്‍ന്നാണ് ലാത്തി നിര്‍മ്മിക്കുന്നത്. വിശാലിന്റെ അടുത്ത സുഹൃത്തുക്കള്‍കൂടിയാണിവര്‍. നവാഗതനായ ഏ. വിനോദ് കുമാറാണ് സംവിധായകന്‍. തമിഴ്, മലയാളം, തെലുങ്ക്, കന്നട, ഹിന്ദി എന്നീ അഞ്ചു ഭാഷകളിലായാണ് ചിത്രം ഒരുങ്ങുന്നത്.
ആക്ഷനും വൈകാരികതയും ഇഴ പിന്നിയ പോലീസ് സ്റ്റോറിയാണ് ‘ലാത്തി’. ഇതില്‍ ഒരു പോലീസ് കോണ്‍സ്റ്റബിളിന്റെ വേഷമാണ് വിശാലിന്. സുനൈനയാണ് നായിക. മലയാളിയായ പി.എന്‍. സണ്ണിയാണ് പ്രതിനായകന്‍. നടന്‍ പ്രഭുവും ഒരു മുഖ്യ കഥാപാത്രത്തെ അവതരിപ്പിക്കുന്നു. ചായാഗ്രഹണച്ചുമതല ബാലസുബ്രഹ്‌മണ്യത്തിനും ബാലകൃഷ്ണ തോട്ടയ്ക്കുമാണ്. യുവന്‍ ഷങ്കര്‍ രാജയാണ് സംഗീത സംവിധായകന്‍. പി.ആര്‍.ഒ. സി.കെ. അജയ്കുമാര്‍.
Recent Comments