വിഷ്ണു വിശാലിനെയും ഐശ്വര്യ ലക്ഷ്മിയെയും കേന്ദ്രകഥാപാത്രങ്ങളാക്കി ചെല്ലാ അയ്യാവു സംവിധാനം ചെയ്യുന്ന ചിത്രമാണ് ‘ഗട്ടാ ഗുസ്തി’. വിഷ്ണു വിശാലിനെ നായകനാക്കി ‘സിലുക്കുവാര്‍പെട്ടി സിങ്കം’ എന്ന ഹിറ്റ് സിനിമ സമ്മാനിച്ച സംവിധായകനാണ് ചെല്ലാ അയ്യാവു. ഇതൊരു സ്‌പോര്‍ട്‌സ് ഡ്രാമ ആക്ഷന്‍ ചിത്രമാണ്.
ആര്‍ടി ടീം വര്‍ക്‌സിന്റെയും വി വി സ്റ്റുഡിയോസിന്റെയും ബാനറില്‍ തെലുങ്ക് താരം രവി തേജയും വിഷ്ണു വിശാലും ചേര്‍ന്നാണ് ചിത്രം നിര്‍മ്മിച്ചിരിക്കുന്നത്.
ഗുസ്തിയും തല്ലും ബഹളവുമായി നടക്കുന്ന യുവാവ് ആണ് വീര. പക്ഷേ, താന്‍ കല്യാണം കഴിക്കുന്ന കുട്ടി അടക്കവും ഒതുക്കവും ഉള്ള പാവമായിരിക്കണമെന്നാണ് വീരയുടെ ആഗ്രഹം. നാട്ടില്‍ വഴക്കാളിയായതു കൊണ്ട് സ്വന്തം നാട്ടില്‍ നിന്നാരും വീരയ്ക്ക് പെണ്ണ് കൊടുക്കില്ല. അവസാനം കേരളത്തില്‍ നിന്നും കീര്‍ത്തി എന്ന പെണ്‍കുട്ടിയെ വീര വിവാഹം കഴിക്കുന്നു. മൂക്കത്ത് ദേഷ്യമുള്ള, ഒന്നു പറഞ്ഞ് രണ്ടാമത് തല്ലിനിറങ്ങുന്ന പരാക്രമിയായ പെണ്‍കുട്ടിയാണ് കീര്‍ത്തി. കല്യാണത്തെ തുടര്‍ന്ന് ഇവരുടെ ജീവിതത്തിലുണ്ടാകുന്ന രസകരങ്ങളായ സംഭവങ്ങളിലൂടെയും പ്രതിസന്ധികളിലൂടെയുമാണ് ചിത്രത്തിന്റെ കഥാപ്രയാണം. വീരയെ വിഷ്ണു വിശാലും കീര്‍ത്തിയെ ഐശ്വര്യ ലക്ഷ്മിയും അവതരിപ്പിക്കുന്നു.
ഹരീഷ് പേരടി, കരുണാസ്, മുനീഷ് കാന്ത്, കിംഗ്സ്ലി, ശ്രീജ രവി, അജയ്, കാളി വെങ്കട് എന്നിവരാണ് ചിത്രത്തിലെ മറ്റ് പ്രധാന അഭിനേതാക്കള്‍. ജസ്റ്റിന്‍ പ്രഭാകരന്‍ സംഗീത സംവിധാനവും റിച്ചാര്‍ഡ് എം നാഥന്‍ ഛായഗ്രഹണവും നിര്‍വഹിക്കുന്നു. ഡിസംബര്‍ 2-ന് മാജിക് ഫ്രെയിംസ് ‘ഗട്ടാ ഗുസ്തി’ കേരളത്തില്‍ റിലീസ് ചെയ്യും. പിആര്‍ഒ സി.കെ. അജയ് കുമാര്‍.
Recent Comments