ഇന്ത്യയൊട്ടാകെ വലിയ തരംഗം സൃഷ്ടിച്ച മാസ്സ് എന്റര്‍ടൈനര്‍ സിനിമയാണ് കെ.ജി.ഫ്. ചിത്രത്തിലെ ഓരോ കഥാപാത്രങ്ങളുടെയും ഗെറ്റ് അപ്പും, ഡയലോഗും, യാഷ് അവതരിപ്പിച്ച റോക്കി ഭായ് എന്ന നായകന്റെ ഹീറോയിസവുമെല്ലാം ചിത്രത്തിന് വളരെ അധികം ആരാധകരെ നേടി കൊടുത്തിരുന്നു.
ചിത്രത്തിന്റെ രണ്ടാം ഭാഗത്തിനായി പ്രേക്ഷകര്‍ ആകാംഷയോടെയാണ് കാത്തിരിക്കുന്നത്.
കെജിഎഫ് 2ല്‍ പ്രധാന വില്ലനായ അധീര എന്ന കഥാപാത്രം ചെയുന്നത് ബോളിവുഡ് താരം സഞ്ജയ് ദത്താണ്. ഇന്ന് അദ്ദേഹത്തിന്റെ പിറന്നാളിനോടനുബന്ധിച്ചാണ് അധീര എന്ന മാസ് വില്ലന്റെ ക്യാരക്ടര്‍ ലുക്ക് പോസ്റ്റര്‍ അണിയറപ്രവര്‍ത്തകര്‍ പുറത്തു വിട്ടത് .
‘യുദ്ധം നടത്തുന്നത് പുരോഗത്തിക്ക് വേണ്ടിയാണ്, എന്റെ ആശയം ശരിയാണെന്ന് കഴുകന്മാര്‍ പോലും സമ്മതിക്കും’ എന്ന അധീരയുടെ മാസ്സ് ഡയലോഗ് ടാഗ് ലൈനാക്കിയാണ് അണിയറ പ്രവര്‍ത്തകര്‍ താരത്തിന് ആശംസകള്‍ നേര്‍ന്നത്.
‘ഊഷ്ണാളമായ പിറന്നാള്‍ ആശംസകള്‍ക്ക് നന്ദി. കെ.ജി. എഫ് 2 ല്‍ വര്‍ക്ക് ചെയ്യാന്‍ സാധിച്ചതില്‍ സന്തോഷിക്കുന്നു. ചിത്രത്തിനായി എല്ലാവരും കുറേ കാലമായി കാത്തിരിക്കുകയാണെന്ന് അറിയാം. ഞാന്‍ ഉറപ്പ് തരുന്നു ആ കാത്തിരിപ്പ് വെറുതെ ആകില്ല.’
എന്ന് താരം തന്റെ ഇന്‍സ്റ്റാഗ്രാമില്‍ കുറിച്ചു.
ജൂലൈ 16ന് റിലീസിന് എത്തേണ്ട ചിത്രം കൊറോണ പ്രതിസന്ധിയെ തുടര്‍ന്ന് പ്രദർശനം നീട്ടി വെയ്ക്കുകയായിരുന്നു. രണ്ടാം പതിപ്പിലും യാഷ് തന്നെയാണ് നായകന്‍. രവീണ ടാണ്ടൺ ഉള്‍പ്പെടെയുള്ള താരങ്ങള്‍ കെജിഎഫില്‍ പ്രധാന വേഷത്തിലെത്തുന്നുണ്ട്. പ്രശാന്ത് നീല്‍ സംവിധാനം ചെയ്യുന്ന ചിത്രം ഡിസംബറില്‍ റിലീസിനെത്തുമെന്നാണ് സൂചന.
ഹോമബിള്‍ ഫിലിംസാണ് യാഷിന്റെ ബ്രഹ്മാണ്ഡ ചിത്രം നിര്‍മ്മിക്കുന്നത്.
1951 മുതല്‍ വര്‍ത്തമാനകാലം വരെയുള്ള കഥയാണ് കെജിഎഫ് രണ്ടാം ഭാഗത്തില്‍ പറയുന്നത്. 2018 ഡിസംബര്‍ 21നാണ് ചിത്രത്തിന്റെ ആദ്യഭാഗം പുറത്തിറങ്ങിയത്. തെന്നിന്ത്യയില്‍ ആകെ തരംഗം സൃഷ്ടിച്ച ചിത്രത്തിന്റെ രണ്ടാം ഭാഗം കേരളത്തില്‍ പ്രദര്‍ശനത്തിനെത്തിക്കുന്നത് പൃഥ്വിരാജ് പ്രൊഡക്ഷന്‍സാണ്. കന്നഡയില്‍ ഇതുവരെ നിര്‍മ്മിക്കപ്പെട്ടതില്‍ ഏറ്റവും നിര്‍മാണച്ചെലവേറിയ ചിത്രമായിരുന്നു കെജിഎഫ്.
ഷെരുണ്‍ തോമസ്
Recent Comments