ഡിസ്‌നി ഹോട്ട് സ്റ്റാറിനുവേണ്ടി നിഥിന്‍ രഞ്ജി പണിക്കര്‍ സംവിധാനം ചെയ്യുന്ന വെബ് സീരീസിന്റെ ഷൂട്ടിംഗ് ജൂണില്‍ ആരംഭിക്കും. കണ്ണൂരിലാണ് തുടക്കം. ഹോട്ട് സ്റ്റാറിന്റെ അഞ്ചാമത്തെ വെബ് സീരീസാണ് ഇത്. സുരാജ് വെഞ്ഞാറമ്മൂട്, കലാഭവന്‍ ഷാജോണ്‍, പ്രശാന്ത് അലക്‌സാണ്ടര്‍, ശ്വേതാമേനോന്‍, ഗ്രേസ് ആന്റണി, നിരഞ്ജന അനൂപ്, കനി കുസൃതി എന്നിവരാണ് താരനിരയിലുള്ളത്.
ഒരു പീരിയോഡിക്കല്‍ ഹ്യൂമറാണ് ഈ വെബ് സീരീസ്. ഇതിന് കഥയും തിരക്കഥയും സംഭാഷണവും എഴുതിയിരിക്കുന്നതും നിഥിന്‍ രഞ്ജിപണിക്കരാണ്. കണ്ണൂരിന് പുറമെ കാസര്‍ഗോഡ്, പാലക്കാട്, പളനി, കുട്ടനാട് എന്നിവിടങ്ങളിലായി ചിത്രീകരണം പൂര്‍ത്തിയാകും. 40 ദിവസത്തെ ഷൂട്ടിംഗാണ് പ്ലാന്‍ ചെയ്തിരിക്കുന്നത്. നിഥിന്‍ രഞ്ജിപണിക്കര്‍ പ്രൊഡക്ഷനാണ് നിര്‍മ്മാണച്ചുമതല.
നിഖില്‍ എസ്. പ്രവീണാണ് ഛായാഗ്രാഹകന്‍. റോണക്‌സ് സേവ്യര്‍ മേക്കപ്പും സുരേഷ് കൊല്ലം കലാസംവിധാനവും മന്‍സൂര്‍ എഡിറ്റിംഗും നിര്‍വ്വഹിക്കുന്ന വെബ് സീരീസിന്റെ പ്രൊഡക്ഷന്‍ കണ്‍ട്രോളര്‍ സഞ്ജയ് പടിയൂരാണ്.
നിലവില്‍ ഹോട്ട്‌സ്റ്റാര്‍ നിര്‍മ്മിക്കുന്ന രണ്ട് വെബ് സീരീസുകളുടെ ചിത്രീകരണം നടന്നുവരികയാണ്. അതില്‍ ഒരെണ്ണം സംവിധാനം ചെയ്യുന്നത് നജീബ് കോയയാണ്. റഹ്‌മാനാണ് കേന്ദ്ര കഥാപാത്രത്തെ അവതരിപ്പിക്കുന്നത്. ആഗസ്റ്റ് സിനിമയുടെ ബാനറില്‍ ഷാജി നടേശനാണ് ഈ വെബ് സീരീസിന്റെ നിര്‍മ്മാണച്ചുമതല. ബേബീസ് എന്നാണ് വെബ് സീരീസിന്റെ പേര്
ഒരു തെക്കന്‍ തല്ലുകേസിന്റെ സംവിധായകന്‍ ശ്രീജിത്താണ് രണ്ടാമത്തെ വെബ് സീരീസ് ഡയറക്ട് ചെയ്യുന്നത്. രഞ്ജി പണിക്കര്‍, അശോകന്‍, നിത്യമേനന്‍, മാലാപാര്‍വ്വതി എന്നിവരാണ് താരനിരയിലുള്ള പ്രമുഖര്‍.
Recent Comments