ഈ ആഴ്ച നിങ്ങള്‍ക്ക് എങ്ങനെ?

മേടക്കൂറ്: അശ്വതി, ഭരണി, കാര്‍ത്തിക 15 നാഴിക

സാമ്പത്തിക ബുദ്ധിമുട്ടുകള്‍ പരിഹരിക്കപ്പെടും. കുടുബത്തില്‍ ഭീതി അന്തരീക്ഷം വര്‍ദ്ധിക്കും. ഉദ്യോഗം തേടി വിദേശയാത്രയ്ക്ക് അവസരം ഉണ്ടാകും. ഉപരിപഠനങ്ങള്‍ക്ക് സാഹചര്യം ഉണ്ടാകും. കുടുംബത്തില്‍ കൂടുതല്‍ ഉത്തരവാദിത്വങ്ങള്‍ ഏറ്റെടുക്കേണ്ടതായി വരും. കൂട്ടുകച്ചവടത്തില്‍ ഫലം കണ്ടുതുടങ്ങും. പിതൃസ്ഥാനീയര്‍ക്കും സഹോദരാദികള്‍ക്കും ഗുണകരമാവും. ഭൂമി ലാഭം ഉണ്ടാകും. മൂത്ത സന്താനത്തെക്കൊണ്ട് മനസ്സ് വിഷമിക്കാനിടവരും. തൊഴിലില്‍ പുരോഗതി ഉണ്ടാകുമെങ്കിലും ബുദ്ധിമുട്ടുകള്‍ അനുഭവിക്കേണ്ടതായി വരും.

ശ്രേയസ്സിനായി സുബ്രഹ്‌മണ്യസ്വാമീക്ഷേത്രദര്‍ശനവും ഭജനവും നടത്തുകയും ദേശദേവീ പ്രീതി വരുത്തുകയും പൈതൃകമായ കര്‍മ്മങ്ങള്‍ അനുഷ്ഠിക്കുകയും വേണം.

ഇടവക്കൂറ്: കാര്‍ത്തിക 45 നാഴിക, രോഹിണി, മകയിരം 30 നാഴിക

മനസ്സിനെ അലട്ടുന്നതായ പ്രശ്‌നങ്ങളും ഇടപെടും. സാമ്പത്തിക നഷ്ടങ്ങള്‍ ആകസ്മികമായി വന്നുചേരും. പകര്‍ച്ചവ്യാധികളും പാരമ്പര്യ രോഗങ്ങളും പിടിപെടാതെ ശ്രദ്ധിക്കണം. അനാവശ്യയാത്രകള്‍ വേണ്ടിവരും. അപവാദങ്ങള്‍ കേള്‍ക്കാനിടയാകും. അപകടങ്ങളില്‍നിന്ന് അത്ഭുതകരമായി രക്ഷപ്പെടും. പിതൃകര്‍മ്മങ്ങള്‍ ചെയ്യാനിടയാകും. മറ്റുള്ളവരുടെ കാര്യങ്ങള്‍ ഏറ്റെടുത്ത് വിജയകരമാക്കി തീര്‍ക്കും. പുതിയതായി വായ്പകള്‍ക്ക് ശ്രമിക്കുന്നവര്‍ക്ക് തടസ്സങ്ങള്‍ വരും. കലാകായിക രംഗങ്ങളില്‍ ശോഭിക്കാനിടയാകും. അനാവശ്യ വിവാദങ്ങളില്‍ ഏര്‍പ്പെടാം. അധികാര-സാമ്പത്തിക ദുര്‍വിനിയോഗത്തില്‍നിന്ന് പിന്തിരിയാന്‍ ശ്രമിക്കും.

കാലദോഷപരിഹാരമായി വിഷ്ണുപ്രീതികരമായ കര്‍മ്മങ്ങള്‍ ചെയ്യുകയും ക്ഷേത്രദര്‍ശനങ്ങളും പ്രാര്‍ത്ഥനകളും പതിവാക്കുകയും ഉപാസനാശീലമുള്ളവര്‍ കൂടുതല്‍ മനോബലത്തോടുകൂടി നടത്തിപ്പോരണം.

മിഥുനക്കൂറ്: മകയിരം 30 നാഴിക തിരുവാതിര, പുണര്‍തം 45 നാഴിക

ദാമ്പത്യജീവിതത്തില്‍ അസ്വാസ്ഥ്യങ്ങളും അഭിപ്രായഭിന്നതകളും ഉണ്ടാകാം. നാഡീഞരമ്പുകള്‍ക്ക് രോഗം ബാധിച്ച് തളര്‍ച്ചയുണ്ടാകാതെ ശ്രദ്ധിക്കണം. നേത്രരോഗം ബാധിക്കും. വിവാഹാദി മംഗളകാര്യങ്ങള്‍ നിര്‍വ്വഹിക്കും. സാമ്പത്തിക ഏര്‍പ്പാടുകളില്‍ വിജയിക്കും. സ്വര്‍ണ്ണം, ഇരുമ്പ് മുതലായ ലോഹ പ്രവര്‍ത്തികള്‍ ഉള്ളവര്‍ക്ക് നേട്ടം ഉണ്ടാകും. സ്ത്രീഹേതുകമായ അപവാദങ്ങള്‍ക്ക് കാരണം ഉണ്ടാകും. സഹോദരങ്ങള്‍ നിമിത്തം മനഃക്ലേശം അനുഭവിക്കും. ദൂരയാത്രകള്‍ പലതും ഒഴിവാക്കേണ്ടതായി വരും. മത്സ്യബന്ധനത്തിലേര്‍പ്പെട്ടിട്ടുള്ളവര്‍ക്ക് പ്രയോജനകരമാണ്. സുഹൃത്തുക്കള്‍ വഴി നേട്ടമുണ്ടാകും.

പരിഹാരമായി ശിവക്ഷേത്രദര്‍ശനവും മല മൂര്‍ത്തി തുടങ്ങിയ അവതാര ശിവസങ്കേതത്തില്‍ ദര്‍ശനം നടത്തി പ്രാര്‍ത്ഥിക്കുകയും കൃഷ്ണസ്വാമീക്ഷേത്രത്തില്‍ പതിവായി ദര്‍ശനം നടത്തി ആരാധിക്കുകയും ചെയ്യണം.

കര്‍ക്കിടകക്കൂറ്: പുണര്‍തം 15 നാഴിക, പൂയം, ആയില്യം

സാമ്പത്തിക ബുദ്ധിമുട്ടുകള്‍ പരിഹരിക്കാന്‍ ക്രയവിക്രയങ്ങള്‍ക്ക് ശ്രമിക്കും. രോഗബാധിതര്‍ക്ക് നേരിയ ശമനം ഉണ്ടാകും. സ്വജനങ്ങളുടെ വിരോധത്തിന് പാത്രമാകും. കൃഷികാര്യങ്ങള്‍ ചെയ്യുന്നവര്‍ക്ക് അത്ര അനുകൂലമാവില്ല. ഗൃഹകരണാദികള്‍ക്ക് തടസ്സങ്ങള്‍ നേരിടാം. വക്കീലന്മാര്‍ക്ക് പ്രമാദമായ പല കേസ്സുകളിലും വിജയിക്കാന്‍ സാധിക്കും. ആത്മീയ ചിന്തയില്‍ കഴിയുന്നവര്‍ക്ക് അവരുടെ നിഷ്ഠകള്‍ക്ക് മുടക്കം നേരിടും. രാഷ്ട്രീയത്തില്‍ ഉള്ളവര്‍ക്ക് പരാജയഭീതി നേരിടും. സുഹൃത്തുക്കള്‍ വഴി ബുദ്ധിമുട്ടുകള്‍ നേരിടും. വീട്ടുകാര്യങ്ങളില്‍ അനാവശ്യമായ ധനനഷ്ടങ്ങള്‍ വന്നുകൂടാം.

പ്രതിബന്ധങ്ങള്‍ മാറാനായി നരസിംഹമൂര്‍ത്തീക്ഷേത്രദര്‍ശനവും ശാസ്താവിങ്കല്‍ ശനിയാഴ്ച ദിവസങ്ങളില്‍ നീരാജനം നടത്തി പ്രാര്‍ത്ഥിക്കുകയും വേണം.

ചിങ്ങക്കൂറ്: മകം, പൂരം, ഉത്രം 15 നാഴിക

പൂര്‍വ്വപുണ്യ ഫലാനുഭവവും ധനലാഭവും ഭാഗ്യോദയവും ഉന്നതസ്ഥാനലബ്ധിയും ശത്രുക്കളുമായി വാദപ്രതിവാദവും ദുരിതവും ഭൂമിലാഭവും ധനലാഭവും സുഖവും ഫലമാകുന്നു. അഭിമാനം, കീര്‍ത്തി ഇവ വര്‍ദ്ധിക്കുകയും പുത്രസുഖമുണ്ടാവുകയും ചെയ്യും. സഹോദരസുഖവും കൃഷി, വാഹനം എന്നിവ നിമിത്തം സന്തോഷവും ഉണ്ടാകും. സ്ത്രീസുഖവും വസ്ത്രലാഭവും ഗൃഹലാഭവും ഉണ്ടാകും. ക്രയവിക്രയങ്ങളില്‍ ലാഭവും പൊതുപ്രവര്‍ത്തകര്‍ക്ക് അനുകൂലവും വിവാദങ്ങളില്‍നിന്ന് ജയവും സഹപ്രവര്‍ത്തകരുടെ സഹായവും ഉണ്ടാകും. സന്താനവിഷയത്തില്‍ മനഃക്ലേശം വന്നുചേരാം.

പരിഹാരമായി ശിവക്ഷേത്രഭജനവും സര്‍പ്പപ്രീതികരമായ കര്‍മ്മങ്ങള്‍ അനുഷ്ഠിക്കുകയും തെക്കുദിക്കിലുള്ള ഭദ്രകാളീക്ഷേത്രത്തില്‍ ദര്‍ശനം നടത്തുകയും മലദൈവാശ്രയവും ചെയ്യണം.

കന്നിക്കൂറ്: ഉത്രം 45 നാഴിക, അത്തം, ചിത്തിര 30 നാഴിക

ഗൃഹകരണാദികള്‍ തുടങ്ങിയവ പൂര്‍ത്തീകരിക്കാന്‍ ശ്രമിക്കും. ഭൂമി ഇടപാടുകള്‍ നിര്‍വ്വഹിക്കും. കൃഷിമേഖലയിലുള്ളവര്‍ക്ക് ഗുണകരമാവുകയില്ല. മത്സ്യബന്ധനത്തില്‍ ഏര്‍പ്പെടുന്നവര്‍ക്ക് അനുകൂലമാവില്ല. സുഹൃത്തുക്കള്‍ മുഖേന ക്ലേശം അനുഭവിക്കും. രോഗികള്‍ക്ക് ചികിത്സാദികളില്‍നിന്ന് ആശ്വാസം ലഭിക്കും. ദൂരയാത്രകള്‍ ആവശ്യമായി വന്നേക്കാം. വാഹനാദികള്‍ വാങ്ങാന്‍ ശ്രമിക്കും. അകന്നു നില്‍ക്കുന്ന ബന്ധുക്കളുടെ സാമീപ്യം ഉണ്ടാകും.

കൃഷ്ണസ്വാമീക്ഷേത്രദര്‍ശനം കൊണ്ടും പാരായണാദി പുരാണ ശ്രവങ്ങളെക്കൊണ്ടും ദുഃഖശമനം വരും. സര്‍പ്പങ്ങള്‍ക്കും പ്രീതികരമായ കര്‍മ്മങ്ങള്‍ നടത്തുകയും വേണം.

തുലാക്കൂറ്: ചിത്തര 30 നാഴിക, ചോതി, വിശാഖം 45 നാഴിക

ബന്ധുജനങ്ങള്‍ക്ക് ആപത്തുകളും സ്വജനവിരോധവും ഉണ്ടാകും. ഊഹക്കച്ചവടങ്ങളില്‍ പ്രതീക്ഷിക്കുന്ന വിജയം കാണില്ല. ക്രയവിക്രയങ്ങളിലും ഭൂമി ഇടപാടുകളിലും കുടുംബജനങ്ങള്‍ പരസ്പരം മനസ്സിലാക്കാനിടവരും. മത്സരപരീക്ഷകളില്‍ നിരാശയ്ക്കിടവരും. പ്രമേഹരോഗികള്‍ കൂടുതല്‍ ശ്രദ്ധിക്കണം. അനാവശ്യ യാത്രകള്‍ കഴിവതും ഒഴിവാക്കുകയാണ് വേണ്ടത്. അയല്‍ക്കാരുമായി മുഷിയാനിടവരും. സാമ്പത്തിക ഏര്‍പ്പാടുകള്‍ നടത്താതിരിക്കുന്നതാണ് ഉചിതം.

ദുര്‍ഗ്ഗാക്ഷേത്രഭജനവും വിഷ്ണുഭജനവും സ്ഥിരമായി നടത്തണം. സ്ത്രീജനങ്ങള്‍ വെള്ളിയാഴ്ച തോറും ഭവനത്തില്‍ നെയ് വിളക്ക് കത്തിച്ച് ലളിതാസഹസ്രനാമം ജപിക്കുന്നത് ഉത്തമമായിരിക്കും.

വൃശ്ചികക്കൂറ്: വിശാഖം 15 നാഴിക, അനിഴം, തൃക്കേട്ട

അവനവന്റേതായ പ്രവര്‍ത്തികളെക്കൊണ്ട് ദുരിതങ്ങള്‍ അനുഭവിക്കേണ്ടതായി വരികയും ഭൂമി സമ്പത്തിന്റെ പേരില്‍ ശത്രുക്കള്‍ക്കിടവരികയും സഹോദരങ്ങളുമായും സഹായികളുമായി പിണങ്ങേണ്ടതായി വരികയും ചെയ്യും. കായികരംഗത്ത് പ്രവര്‍ത്തിക്കുന്നവര്‍ക്ക് അനുകൂലസമയമായിരിക്കും. വ്രതനിഷ്ഠാദികള്‍ മുടക്കേണ്ടതായി വരും. സാഹസപ്പെട്ട് ചെയ്യുന്ന കാര്യങ്ങള്‍ വിജയപ്രാപ്തി കാണും. സ്ത്രീസന്താനങ്ങളുടെ മംഗളകാര്യങ്ങള്‍ക്കായി പണം ചെലവഴിക്കും. സഹോദരസ്ഥാനീയര്‍ക്ക് രോഗപീഡകള്‍ ഉണ്ടാകാം.

ദോഷശമനത്തിനായി ഭദ്രകാളീഭജനം, സുബ്രഹ്‌മണ്യസ്വാമീക്ഷേത്രദര്‍ശനം ഇവയും ഷഷ്ഠിവ്രതവും ആചരിക്കണം.

ധനുക്കൂറ്: മൂലം, പൂരാടം, ഉത്രാടം 15 നാഴിക

കുടുംബത്തില്‍ പരസ്പരമാത്സര്യങ്ങള്‍ക്കിടവരും. കുടുംബജീവനവും ക്ലേഖകരമാകും. മദ്യപാനികളെക്കൊണ്ട് ദുരിതങ്ങള്‍ ഉണ്ടാകും. കളരി, കരാട്ടെ തുടങ്ങിയ കായികാഭ്യാസകലകളില്‍ ബന്ധപ്പെട്ടവര്‍ക്ക് അനുകൂലമായിരിക്കും. ത്വക്‌രോഗങ്ങള്‍ വരാതെ ശ്രദ്ധിക്കണം. വിദേശത്തുള്ളവര്‍ക്ക് തൊഴില്‍ നഷ്ടപ്പെടാം. അഗ്നിഭയവും ദുര്‍ജ്ജന ഭീതിയും ഉണ്ടാകാം. ഉദ്യോഗക്കയറ്റം പ്രതീക്ഷിക്കുന്നവര്‍ക്ക് കാലതാമസം നേരിടും. പൊതുമേഘലാസ്ഥാപനങ്ങളില്‍ ജോലി ചെയ്യുന്നവര്‍ക്ക് സാമ്പത്തിക ബുദ്ധിമുട്ടുകള്‍ക്കിടവരും. കൂട്ടുബിസിനസ്സുകള്‍ക്ക് പരാജയം നേരിടും.

ധന്വന്തരീക്ഷേത്രദര്‍ശനവും ഭജനവും നടത്തണം. ഭവനത്തില്‍ വിഷ്ണുസഹസ്രനാമജപം പതിവാക്കുകയും ചെയ്യണം.

മകരക്കൂറ്: ഉത്രാടം 45 നാഴിക, തിരുവോണം, അവിട്ടം 30 നാഴിക

ദാമ്പത്യജീവിതത്തില്‍ വൈരുദ്ധ്യങ്ങളും സ്ത്രീകള്‍ മുഖേനയുള്ള സ്വസ്ഥതക്കേടുകളും ഉണ്ടാകും. സാമ്പത്തികമായ ബാധ്യതകളും അപ്രതീക്ഷിതമായ ചെലവുകളും വന്നുകൂടാം. തൊഴില്‍പരമായ നഷ്ടങ്ങളും സ്ഥാനഭ്രംശവും ഉണ്ടാകും. വ്യവസായസ്ഥാപനങ്ങള്‍ സ്തംഭനാവസ്ഥയിലാവുകയും ഏര്‍പ്പെട്ട കരാറുകള്‍ക്ക് മുടക്കവും ഉണ്ടാകും. നിശ്ചയിച്ച വിവാഹങ്ങള്‍ക്ക് മുടക്കവും പല പ്രകാരത്തിലെ അപവാദങ്ങള്‍ക്ക് കാരണമാവുകയും ചെയ്യും. വസ്ത്രവ്യാപാരമേഖലയിലുള്ളവര്‍ക്ക് പ്രയോജനകരമാകും. സ്ത്രീകള്‍ മുഖാന്തിരം മാനസിക ക്ലേശങ്ങള്‍ അനുഭവിക്കും.

ശാസ്താക്ഷേത്രത്തില്‍ നിത്യദര്‍ശനം നടത്തുകയും മഹാവിഷ്ണു ക്ഷേത്രത്തില്‍ സഹസ്രനാമപുഷ്പാഞ്ജലി നടത്തുകയും വേണം.

കുംഭക്കൂറ്: അവിട്ടം 30 നാഴിക, ചതയം, പൂരുരുട്ടാതി 45 നാഴിക

തീരുമാനമെടുക്കുന്ന കാര്യങ്ങള്‍ക്ക് മുടക്കവും ലഭിക്കേണ്ടതായ സാമ്പത്തികം തടസ്സമാവുകയും സഹായികളായി നില്‍ക്കുന്നവര്‍ക്ക് വാക്ക് പാലിക്കാതെ വരികയും ചെയ്യും. ദൂരയാത്രകള്‍കൊണ്ട് പ്രയോജനമില്ലാതെ വരികയും ധനനഷ്ടങ്ങള്‍ യാത്രാവേളയില്‍ ഉണ്ടാവുകയും ചെയ്യും. നാഡീഞരമ്പുകള്‍ക്കും ഹൃദയത്തിനുമുള്ള രോഗങ്ങള്‍ ഉണ്ടാകും. അയല്‍ക്കാരുമായി സ്‌നേഹത്തില്‍ നില്‍ക്കുമെങ്കിലും അവസാനം മനഃപ്രയാസം അനുഭവിക്കും. റബ്ബര്‍ കര്‍ഷകര്‍ക്ക് ആശ്വാസത്തിനിടവരും. വാഹനാദികളില്‍ ഭ്രമം വര്‍ദ്ധിക്കാം. മാതൃജനങ്ങള്‍ക്ക് ആപത്തുകള്‍ ഉണ്ടാകും.

നിത്യം ശാസ്താക്ഷേത്രദര്‍ശനം നടത്തുകയും ഭവനത്തില്‍ എള്ളെണ്ണ നിറച്ച് തിരി കത്തിച്ച് പ്രാര്‍ത്ഥിക്കുകയും ശിവങ്കല്‍ യഥാശക്തി വഴിപാടുകളും നടത്തുക.

മീനക്കൂറ്: പൂരുരുട്ടാതി 15 നാഴിക, ഉത്തൃട്ടാതി, രേവതി

മത്സ്യമേഖലയില്‍ പ്രവര്‍ത്തിക്കുന്നവര്‍ക്ക് ഗുണകരമായിരിക്കുകയും കാര്‍ഷികമേഖലയില്‍ അധഃപതനവും ഉണ്ടാകും. സുഹൃത്തുക്കള്‍ പരസ്പരം പാരവയ്ക്കുന്നവരാകും. ബന്ധുജന വിരോധവും ഭാര്യാഭര്‍ത്താക്കന്മാര്‍ പരസ്പരം പിണങ്ങി ജീവിക്കേണ്ടതായ സാഹചര്യവും ഉണ്ടാകും. ലോഹനിര്‍മ്മാണത്തിലുള്ളവര്‍ക്ക് അനുകൂലമാണ്. സൂഹൃത്തുക്കളില്‍നിന്ന് വിപരീത അനുഭവങ്ങള്‍ നേരിടേണ്ടതായും വരും. ക്രയവിക്രയങ്ങളില്‍ സാമ്പത്തികനഷ്ടങ്ങള്‍ ഉണ്ടാകും. ഭൂമിലാഭം ഉണ്ടാകും. സ്ത്രീജനങ്ങള്‍ക്ക് രോഗാദി ഉപദ്രവങ്ങള്‍ ഉണ്ടാകും. സന്താനങ്ങളെക്കൊണ്ട് ദുഃഖം അനുഭവിക്കും.

ശിവഭജനം നടത്തുകയും ശിവാഷ്ടകം നിത്യം ജപിക്കുകയും വേണം. നവഗ്രഹങ്ങളില്‍ വ്യാഴപ്രീതികരമായ കര്‍മ്മങ്ങള്‍ ചെയ്യേണ്ടതാണ്.