പൃഥ്വിരാജിനെ നായകനാക്കി മനു വാര്യര്‍ സംവിധാനം ചെയ്ത പുതിയ ചിത്രമാണ് കുരുതി. കഴിഞ്ഞ ദിവസമാണ് ചിത്രത്തിന്റെ ട്രെയിലര്‍ അണിയറപ്രവര്‍ത്തകര്‍ പുറത്തുവിട്ടത്. ആമസോണ്‍ പ്രൈമിലൂടെ ഓഗസ്റ്റ് 11 നാണ് ചിത്രം റിലീസിന് എത്തുന്നത്. ഇപ്പോഴിതാ ട്രെയിലറിന് അഭിനന്ദനവുമായി എത്തിയിരിക്കുകയാണ് ബോളിവുഡ് സംവിധായകന്‍ കരണ്‍ ജോഹര്‍.
ട്രെയിലര്‍ മികച്ചതാണെന്നും ചിത്രം കാണുവാന്‍ കാത്തിരിക്കുകയാണെന്നും അദ്ദേഹം പറഞ്ഞു. ട്വിറ്ററിലൂടെയാണ് അദ്ദേഹത്തിന്റെ പ്രതികരണം. ‘എന്ത് സൂപ്പര്‍ ട്രെയ്ലറാണ് പൃഥ്വി, കാണാനായി കാത്തിരിക്കുന്നു’, എന്നാണ് കരണ്‍ ജോഹര്‍ ട്വീറ്റ് ചെയ്തത്.
കരണ്‍ ജോഹറിന്റെ അഭിനന്ദനത്തിന് പൃഥ്വിരാജ് നന്ദിയും പറഞ്ഞിട്ടുണ്ട്.
പൃഥ്വിരാജ് പ്രൊഡക്ഷന്‍സിന്റെ ബാനറില്‍ സുപ്രിയ മേനോനാണ് ചിത്രം നിര്‍മ്മിച്ചിരിക്കുന്നത്. റോഷന്‍ മാത്യൂ, ഷൈന്‍ ടോം ചാക്കോ, മുരളി ഗോപി, മാമുക്കോയ, ശ്രിന്ദ, മണികണ്ഠന്‍ ആചാരി, നവാസ് വള്ളിക്കുന്ന്, നെസ്ലന്‍, സാഗര്‍ സൂര്യ തുടങ്ങിയവരും മറ്റ് പ്രധാന കഥാപാത്രങ്ങളെ അവതരിപ്പിക്കുന്നുണ്ട്. ഛായാഗ്രഹണം നിര്‍വഹിച്ചിരിക്കുന്നത് അഭിനന്ദന്‍ രാമാനുജനാണ്. ജെയ്ക്‌സ് ബിജോയുടേതാണ് സംഗീതം. സംവിധായക്കാന്‍ മനു വാരിയരുടെ ആദ്യ മലയാള ചിത്രമാണ് കുരുതി. 2014ല്‍ പുറത്തിറങ്ങിയ കോഫി ബ്ലും എന്ന ഹിന്ദി സിനിമയാണ് ആദ്യ ചിത്രം.
Recent Comments