ഡബ്ല്യുസിസിയുടെ സ്ഥാപക അംഗങ്ങളായിരുന്ന മഞ്ജുവാര്യരും വിധു വിന്‍സെന്റും ഇപ്പോള്‍ സംഘടനയില്‍ സജീവമല്ലാത്തതിന് കാരണം എന്താണെന്ന ചോദ്യത്തിന് മറുപടി പറഞ്ഞ് പാര്‍വ്വതി തിരുവോത്ത്. അവരോടുള്ള ചോദ്യങ്ങള്‍ അവര്‍ക്കുനേരെയാണ് ഉന്നയിക്കേണ്ടത്. ദ് ന്യൂസ് ഇന്ത്യന്‍ എക്‌സ്പ്രസിന് നല്‍കിയ അഭിമുഖത്തിലാണ് പാര്‍വ്വതി നിലപാട് തുറന്നുപറഞ്ഞത്.
ചോദ്യത്തിനുള്ള പാര്‍വ്വതി തിരുവോത്തിന്റെ മറുപടി ഇങ്ങനെ: ‘അത് നിങ്ങള്‍ അവരോട് തന്നെ ചോദിക്കണം. കാരണം അതിനെക്കുറിച്ച് സംസാരിക്കേണ്ട ആള്‍ ഞാനല്ല. എല്ലായ്‌പ്പോഴും എന്നോടു തന്നെ ഈ ചോദ്യം പലരും ആവര്‍ത്തിക്കുന്നത് ന്യായമല്ലെന്ന് എനിക്ക് തോന്നാറുണ്ട്. എന്തുകൊണ്ടാണ് നിങ്ങള്‍ ഇത് എന്നോട് ചോദിക്കുന്നത്? അവരോടല്ലേ ചോദിക്കേണ്ടത്? നിങ്ങള്‍ക്ക് അവരുടെ അഭിമുഖങ്ങള്‍ ലഭിക്കില്ല എന്നൊന്നും ഇല്ലല്ലോ. പക്ഷേ വളരെ സൗകര്യപ്രദമായി, സുഖകരമായി നിങ്ങള്‍ ഏറ്റവും കഠിനാദ്ധ്വാനം ചെയ്യുന്നവരോട് തന്നെ ഇത് ചോദിച്ചുകൊണ്ടിരുന്നു. അങ്ങനെ ഞങ്ങള്‍ കൂടുതല്‍ അപമാനിക്കപ്പെട്ടുകൊണ്ടിരിക്കുന്നു.
എന്തുകൊണ്ടാണ് ഈ സ്‌പേസ് നിങ്ങള്‍ സംസാരിക്കാന്‍ അധികം അവസരം ലഭിക്കാത്ത ആളുകള്‍ക്ക് കൊടുക്കാത്തത്? എനിക്കും അറിയാന്‍ ആഗ്രഹമുണ്ട്. നിങ്ങള്‍ അവരോട് ചോദിക്കുമ്പോള്‍ അവര്‍ എന്തു മറുപടിയാണ് നല്‍കുന്നത്? ഒരു പ്രത്യേ വ്യക്തിയോട് മാത്രമല്ല ഞാനിത് പറയുന്നത്, മുഴുവന്‍ മാധ്യമങ്ങളോടുമാണ്. എനിക്ക് ഉത്തരം അറിയാത്ത കാര്യങ്ങള്‍ എന്നോട് തന്നെ ചോദിച്ചുകൊണ്ടിരിക്കുന്നത് എന്തിനാണ്. നിങ്ങള്‍ മാധ്യമങ്ങളാണ്, നിങ്ങള്‍ അന്വേഷകരാണ്, സത്യം പുറത്തുകൊണ്ടുവരേണ്ടത് നിങ്ങളാണ്. എനിക്ക് ആരോടും ഒരു ബാധ്യതയുമില്ല. എനിക്ക് എന്റെ സത്യങ്ങള്‍ മാത്രമാണ് പറയാന്‍ കഴിയുക. മറ്റൊരാളുടെ സത്യം അറിയാന്‍ എന്നോട് ചോദിക്കുന്നത് ന്യായമല്ല.’ പാര്‍വ്വതി തിരുവോത്ത് പറയുന്നു.
Recent Comments