ജയ ജയ ജയ ജയ ഹേ എന്ന സൂപ്പര്‍ ഹിറ്റ് ചിത്രത്തിനുശേഷം വിപിന്‍ദാസ് സംവിധാനം ചെയ്യുന്ന പുതിയ സിനിമയാണ് ഗുരുവായൂരമ്പല നടയില്‍. പൃഥ്വിരാജും ബേസില്‍ ജോസഫും കേന്ദ്രകഥാപാത്രങ്ങളെ അവതരിപ്പിക്കുന്ന ചിത്രത്തിന്റെ പ്രഖ്യാപനം നേരത്തേതന്നെ പുറത്ത് വന്നിരുന്നു. ചിത്രത്തിന്റെ പുതിയ അപ്‌ഡേറ്റ് കാന്‍ ചാനലുമായി പങ്കുവയ്ക്കുകയാണ് സംവിധായകന്‍ വിപിന്‍ദാസ്.
‘ചിത്രത്തില്‍ യോഗി ബാബു ഒരു പ്രധാന വേഷം ചെയ്യുന്നു. ഇന്ന് രാവിലെ പാലക്കാട്ടുള്ള ലൊക്കേഷനില്‍വച്ച് യോഗി ബാബുവിനെ കണ്ടിരുന്നു. ചെന്നൈയില്‍ പോയി അദ്ദേഹത്തെ കാണാനിരുന്നതാണ്. അപ്പോഴാണ് ഒരു തമിഴ് ചിത്രത്തിന്റെ ഷൂട്ടിംഗുമായി ബന്ധപ്പെട്ട് അദ്ദേഹം പാലക്കാട്ട് എത്തുന്നുണ്ടെന്നുള്ള വിവരം പറഞ്ഞത്. യോഗിബാബുവിനോട് കഥ പറഞ്ഞു. അദ്ദേഹത്തിന്റെ കഥാപാത്രത്തെക്കുറിച്ചും വിശദീകരിച്ചു. രണ്ടും അദ്ദേഹത്തിന് ഇഷ്ടമായി. പ്രൊജക്ട് കമ്മിറ്റ് ചെയ്തു. മെയില്‍ ചിത്രത്തിന്റെ ആദ്യഷെഡ്യൂള്‍ നടക്കും.’ വിപിന്‍ദാസ് പറഞ്ഞു.
പൃഥ്വിരാജ് പ്രൊഡക്ഷനും E4E മൂവീസും ചേര്‍ന്നാണ് ചിത്രം നിര്‍മ്മിക്കുന്നത്. താരനിര്‍ണ്ണയമടക്കമുള്ള കാര്യങ്ങള്‍ പുരോഗമിക്കുകയാണ്.
Recent Comments